Bakı,AzerVoice
Türkiyənin Xarici İşlər Naziri Hakan Fidan, 20-21 fevral tarixlərində Cənubi Afrika Respublikasının Yohannesburq şəhərində keçiriləcək G20 Xarici İşlər Nazirləri Birinci Toplantısında iştirak edəcək.
AzerVoice xəbər verir ki, Fidan toplantının "Qlobal Geosiyasi Vəziyyət" və "2025-ci ildə G20 Məqsədləri: Cənubi Afrika Respublikasının G20 Dövr Başçılığının Qiymətləndirilməsi, Yüksək Səviyyəli Nəticələr və G20-nin Hesabatı" mövzularında keçiriləcək sessiyalarda çıxış edəcək.
Fidan, G20 Xarici İşlər Nazirləri Birinci Toplantısında iştirak edəcəyi sessiyalarda Qəzza, Suriya, Livan və Rusiya-Ukrayna müharibəsi də daxil olmaqla beynəlxalq və regional mövzularda Türkiyənin mövqeyini paylaşacaq və beynəlxalq sistemin üzləşdiyi çətinliklər qarşısında G20 platformasının əhəmiyyətinə diqqət çəkəcək.
Nazir Fidan, G20 çərçivəsində keçiriləcək MIKTA (Meksika, İndoneziya, Cənubi Koreya, Türkiyə, Avstraliya) 27-ci Xarici İşlər Nazirləri Toplantısında da iştirak edəcək.
Türkiyə, son dövrlərdə "Rusiyanın Ukraynanı işğalı" və İsrailin Qəzzaya hücumları fonunda siyasi məsələlərin də müzakirə edildiyi bir platforma olan G20-ni qlobal iqtisadi əməkdaşlıq və koordinasiya baxımından mühüm bir platforma kimi dəyərləndirir.
Qeyd edək ki, Cənubi Afrika Respublikası 1 dekabr 2024-cü il tarixindən etibarən G20 Dövr Başçılığını Braziliyadan təhvil alıb.
Rotasiya və səbət sistemi çərçivəsində, son illərdə G20 Dövr Başçılığını yüksələn iqtisadiyyata sahib ölkələr həyata keçirir. G20 gündəminin müəyyənləşdirilməsində dövr başçısı olan ölkə əsas rol oynayır.
Cənubi Afrika Respublikasının G20 Dövr Başçılığında prioritet istiqamətlər arasında fəlakətlərə qarşı davamlılığın və cavab mexanizmlərinin gücləndirilməsi, aşağı gəlirli ölkələr üçün borc dayanıqlığının təmin edilməsi, ədalətli enerji keçidi üçün maliyyənin təmin olunması və inklüziv böyümə ilə davamlı inkişaf üçün mühüm minerallardan faydalanmaq məqsədi var.
