BAKI,AzerVoice
Türkiyə Prezidenti Rəcəb Tayyib Ərdoğan İstanbulda keçirilən İslam Əməkdaşlıq Təşkilatının (İƏT) Xarici İşlər Nazirləri Şurasının 51-ci sessiyasında çıxış edərək İsrailin Yaxın Şərqdəki hərbi müdaxilələrinə və xüsusilə İrana qarşı həyata keçirdiyi hücumlara sərt reaksiya verib.
AzerVoice xəbər verir ki, Ərdoğan bildirib ki, İsrailin bölgədə apardığı işğal, dağıdıcı müharibə və təxribat siyasəti artıq İrana da yönəlib.
“13 iyundan bu yana İsrailin dövlət terroruna qonşumuz İran məruz qalır. Bu hücumları ən sərt şəkildə qınayıram. Həyatını itirən İranlı qardaşlarımız üçün ölkəm və millətim adından başsağlığı verirəm” – deyə o qeyd edib.
Ərdoğan İran xalqının tarixi, milli həmrəyliyi və güclü dövlətçilik ənənəsinə arxalanaraq bu çətin dövrü də dəf edəcəyinə əminliyini ifadə edib.
Ərdoğan, həmçinin, İsrail Baş naziri Benyamin Netanyahunun rəhbərlik etdiyi hökuməti bölgə sülhü üçün ən böyük təhlükə adlandıraraq deyib.
“Bütün bu hücumları ilə Netanyahu hökuməti bir daha sübut etdi ki, regional barışın qarşısındakı ən böyük maneə məhz odur”- deyə o vurğulayıb.
O, çıxışında həmçinin İsrailin Qəzza, Yəmən, Livan və Suriyaya qarşı həyata keçirdiyi bombardman və hərbi əməliyyatlara da toxunaraq, bu hücumların insanlıq əleyhinə cinayətlər olduğunu vurğulayıb.
