BAKI, AzerVoice

İran və İsrail arasında artan gərginlik səbəbindən Türkiyəyə məxsus 11 mülki təyyarə bölgədə qapalı vəziyyətdə qalıb.

AzerVoice xəbər verir ki, bu barədə Nəqliyyat və İnfrastruktur naziri Abdulkadir Uraloğlu jurnalistlərə açıqlama verib.

Onun sözlərinə görə, hazırda 7 təyyarə İranda, 4 təyyarə isə İraqda yerləşir.

“Raketlərin və pilotsuz uçuş aparatlarının intensiv fəaliyyəti səbəbilə nə Türkiyə tərəfi, nə də qarşı tərəflər bu mərhələdə təyyarələrin uçuşuna icazə verə bilmir. Təhlükəsizlik riskini nəzərə alaraq, müvafiq qurumlarla – Xarici İşlər Nazirliyi və Milli Kəşfiyyat Təşkilatı vasitəsilə vəziyyəti yaxından izləyirik”- deyə o bildirib.

Hazırda bölgədə qapalı qalan təyyarələr aşağıdakı şirkətlərə məxsusdur: Pegasus – 7 ədəd, Türk Hava Yolları (THY) – 2 ədəd, AJet – 1 ədəd, Tailwind – 1 ədəd.

Qeyd edək ki, 13 iyun tarixində İsrailin İranın paytaxtı Tehrana və digər strateji bölgələrinə həyata keçirdiyi hava hücumları regionda gərginliyi pik həddə çatdırıb. “Yüksək Aslan əməliyyatı” adlanan hücumlarda 200-ə yaxın İsrail təyyarəsi iştirak edib və nüvə obyektləri də daxil olmaqla 100-ə yaxın hədəf vurulub.

İsrailin bu addımı beynəlxalq reaksiyalara səbəb olub. ABŞ rəsmi dairələri əməliyyatda iştirak etmədiklərini bildirərək, İranı ABŞ maraqlarını hədəf almamaq barədə xəbərdar edib. ABŞ Prezidenti Donald Tramp isə İrana daha sərt cavabların verilə biləcəyini deyib.