BAKI, AzerVoice
Türkiyə Prezidenti Rəcəb Tayyib Ərdoğan, Haliç Konqres Mərkəzində təşkil olunan Ziraat Bankası Kənd Təsərrüfatı Ekosistemi Görüşündə çıxışı zamanı ölkədəki müxalifət və İstanbul Böyükşəhər Bələdiyyəsinə (İBB) qarşı aparılan korrupsiya istintaqı məsələlərinə toxunub.
AzerVoice xəbər verir ki, Ərdoğan, Türkiyədəki zəhərli müxalifət anlayışına tez-tez diqqət çəkdiyini və bu anlayışın ölkəyə verdiyi zərərlərdən bəhs etdiyini xatırladaraq qeyd edib ki, Türkiyə hər sahədə irəlilədiyi halda, müxalifət – xüsusilə də əsas müxalifət partiyası xroniki hala çevrilmiş keyfiyyət problemi ilə narahatlıq doğurur.
“Ekranlardakı və qəzetlərdəki müzakirələri siz də izləyirsiniz. Uzun illər birlikdə yol getdikləri, birlikdə iş gördükləri, bələdiyyələrdə yüksək vəzifələr verdikləri dostları İstanbulun imkanlarının necə talandığını açıq-aşkar etiraf etməyə başlayıblar. Xalqa xidmət üçün xərclənməli olan vəsaitlərin siyasəti dizayn etmək üçün necə çəkinmədən istifadə edildiyi bir-bir ifşa olunur. İstanbulu zəhərli sarmaşıq kimi saran cinayət şəbəkəsinin kimlərdən hədə-pul aldığı, kimləri maaşa bağladığı yavaş-yavaş bəlli olur" - deyə, Ərdoğan bildirib.
"Cəmi iki il əvvəl Türkiyəni idarə etməyə layiq gördükləri şəxs haqqında bu gün dediklərini eşitdikcə “Allah bu millətin üzünə baxıb” deyirik. Onların gündəmində nə xalq var, nə də kəndli. Şübhə ilə yatır, iftira ilə qalxırlar” - deyə, o əlavə edib.
Bununla yanaşı, Türkiyə Prezidenti, müxalifətin ölkənin iqtisadiyyatına zərər verdiyini vurğulayıb.
"Nəticə etibarilə xalqa və dövlətə heç bir faydaları olmadığı kimi, zəhərli siyasətləri ilə Türkiyəyə və ölkə iqtisadiyyatına zərər verirlər. Sonra da çıxıb Məclisdə mazut bidonu ilə xalqçılıq nümayiş etdirirlər. Nə deyək, Rəbbim ölkəmizi və millətimizi bunların insafına buraxmasın” - deyə, Ərdoğan yekunlaşdırıb.
Xatırladaq ki, bundan əvvəl İstanbul Böyükşəhər Bələdiyyəsinə (İBB) qarşı aparılan korrupsiya istintaqı çərçivəsində həbs olunaraq vəzifəsindən uzaqlaşdırılan Əkrəm İmamoğlu barəsində, "ictimai vəzifəli şəxsə təhqir" ittihamı ilə istintaq başladılmışdı.
Qeyd edək ki, martın 23-də Türkiyə məhkəməsi Əkrəm İmamoğlu barəsində həbs qərarı çıxarıb. O, korrupsiya və digər maddələrlə ittiham olunur.
