BAKI, Azervoice, Nərmin Ağayeva
Türkiyə vitse-prezidenti Cevdet Yılmaz, İsrail Nazirlər Kabinetinin Qəzzanın işğal planını təsdiqləməsinin bölgədə yeni və təhlükəli mərhələnin başlanğıcı olduğunu bildirib.
Azervoice xəbər verir ki, sosial media hesabında açıqlama yayan Yılmaz, planın konkret bir müqavimət təşkilatına qarşı deyil, bütövlükdə Fələstin xalqına yönəldiyini vurğulayıb. O, İsrailin mülki əhalini, o cümlədən uşaqları hədəf almasının qanunlara və bütün humanitar dəyərlərə zidd olduğunu, atəşkəsdən yayındığını, yardımlara mane olduğunu və iki dövlətli həll yolunu məhv etdiyini qeyd edib.
Qeyd edək ki, Yılmaz qlobal ictimaiyyətin və müxtəlif ölkələrin İsrailə qarşı sərgilədiyi reaksiyaları “ümidverici” adlandıraraq, effektiv sanksiyaların BMT daxil olmaqla bütün beynəlxalq platformalarda gündəmdə olmasının vacibliyini vurğulayıb. O, Türkiyənin diplomatik, humanitar və hüquqi müstəvidə Fələstin xalqının yanında olmağa davam edəcəyini bildirib.
