BAKI,AzerVoice
Türkiyənin Makina və Kimya Sənayesi Qurumu (MKE) ölkə tarixinin ən iri sərmayələrindən birini həyata keçirərək müdafiə sənayesində strateji müstəqillik hədəfini daha da irəli daşıyır. AzerVoice xəbər verir ki, hal-hazırda 105 ölkəyə ixrac həyata keçirən və 2024-cü ildə 1,2 milyard dolları aşan dövriyyəyə malik olan qurum, yeni layihələrlə partlayıcı maddələrin istehsalında xarici asılılığı tamamilə aradan qaldırmağı planlaşdırır.
MKE-nin həyata keçirdiyi layihələr içində ən diqqətçəkəni 4,7 milyon kvadratmetrlik Enerji Materialları Fabrikidir. Müdafiə sənayesində “birinci, bütün sektorlar üzrə isə üçüncü ən böyük sərmayə” kimi xarakterizə olunan bu layihənin icrası sürətlə davam edir.
Ümumilikdə 10 zavod və 3 müəssisədə istehsal gücünün artırılması, yeni xətlərin istifadəyə verilməsi üçün görülən işlərin ümumi dəyəri 818 milyon dollar təşkil edir. Bundan əlavə, 2025-ci ildən etibarən 323 yeni sərmayə layihəsi paralel şəkildə həyata keçiriləcək.
MKE, Samsunun Çarşamba rayonunda istifadəsiz vəziyyətdə qalan keçmiş şəkər zavodunu Nitroguanidin istehsal müəssisəsinə çevirərək həm ölkənin milli tələblərinə, həm də bölgənin iqtisadi inkişafına töhfə verməyi hədəfləyir. Bu çevrilmə ilə yalnız istehsal gücünün deyil, eyni zamanda bölgənin sosial-iqtisadi dinamizminin də artacağı vurğulanır.
MKE bildirir ki, həyata keçirilən sərmayələr sadəcə istehsal gücünü artırmaqla kifayətlənməyəcək, eyni zamanda Türkiyənin müdafiə sənayesində qlobal rəqabət qabiliyyətini möhkəmləndirəcək. Milli istehsalın təmin etdiyi strateji müstəqillik isə gələcəyin texnologiyaları üçün kritik baza rolunu oynayacaq.
