BAKI, AzerVoice, Nailə Babazadə
Türkiyənin elektrikli avtomobil markası olan Togg, Avropanın avtomobil təhlükəsizliyi sahəsində ən nüfuzlu qurumlarından biri olan Euro NCAP tərəfindən keçirilən testlərdə yüksək nəticə göstərərək 5 ulduzla qiymətləndirilib.
AzerVoice xəbər verir ki, Belçikanın Leuven şəhərində yerləşən Euro NCAP tərəfindən aparılan testlərdə Togg-un T10F sedan və T10X SUV modelləri təhlükəsizlik göstəriciləri baxımından "mükəmməl" hesab olunub.
Euro NCAP tərəfindən yayımlanan açıqlamada qeyd olunur ki, Togg-un hər iki modeli yetkin sərnişinlərin müdafiəsi, uşaq sərnişinlərin təhlükəsizliyi, yol hərəkətində zəif iştirakçılar üçün qoruma və aktiv təhlükəsizlik sistemləri sahəsində yüksək göstəricilər əldə edib. T10F modeli yetkin sərnişin müdafiəsində 95 faiz, T10X isə 94 faiz nəticə göstərib. Hər iki model uşaq sərnişinlərin qorunması üzrə 85 faiz, təhlükəsizlik yardım sistemləri üzrə isə 80 faiz göstəriciyə nail olub.
Açıqlamada vurğulanır ki, Togg-un bu nəticələri yeni bir avtomobil markası üçün olduqca təsiredici hesab olunur. Euro NCAP proqram direktoru Aled Williams bu barədə verdiyi açıqlamada bildirib ki, Togg elektrikli avtomobil bazarında iddialı bir rəqib olduğunu nümayiş etdirmək məqsədilə yola çıxıb və ilk iki modeli ilə 5 ulduzlu nəticə qazanaraq gözləntiləri aşıb. O əlavə edib ki, testlərdən sonra mütəxəssislər Togg-un mühəndisliyindən və təhlükəsizlik səviyyəsindən olduqca təsirləniblər.
Togg-un gələcək planlarına da toxunulan açıqlamada, şirkətin 2030-cu ilə qədər Avropa bazarına 1 milyon elektrikli avtomobil ixrac etməyi hədəflədiyi, ümumilikdə isə məhsul çeşidini 5 fərqli modelə çatdırmağı planlaşdırdığı qeyd olunub. Avtomobillərin dizaynı məşhur türkiyəli dizayner Murat Günak tərəfindən hazırlanıb. Günak daha əvvəl Peugeot, Mercedes-Benz və Volkswagen qruplarında dizayna rəhbərlik etmiş təcrübəli mütəxəssis kimi tanınır.
Qeyd edək ki, Türkiyə artıq Fiat, Mercedes-Benz və Renault kimi bir çox Avropa avtomobil markalarının istehsal mərkəzi kimi tanınır və ölkədə hər il 1,5 milyondan çox avtomobil və kommersiya nəqliyyatı istehsal olunur.
Euro NCAP, Avropada satılan yeni avtomobil, kamyon və minik avtomobillərinin təhlükəsizlik göstəricilərini qiymətləndirərək, istehlakçılara, siyasətçilərə və avtomobil sənayesinə real və müstəqil məlumat təqdim edən qurumdur.
