BAKI, AzerVoice, Fərid Mikayılov
Türkiyənin Xarici İşlər naziri Hakan Fidan, regional inkişaflara dair qiymətləndirmələrində İsrailin Qətərə hücumunu sərt tənqid edərək bunun bölgədə yeni bir mərhələ açdığını vurğulayıb.
AzerVoice xəbər verir ki, nazir bildirib ki, İsrail artıq risklərini hesablamış və Fələstin məsələsinin də o üzünə keçərək regional genişlənmə siyasəti yürütməyə başlayıb.
Fidan deyib ki, Qətərə edilən hücum regiondakı sabitliyi ciddi şəkildə zədələyib.
“Bütün bunlar göstərir ki, İsrail artıq bütün risklərini nəzərə alıb və genişlənməni Fələstin məsələsinin də kənarında yeni siyasət kimi qəbul edib”- deyə o bildirib.
Türkiyənin regional siyasətinə də toxunan Fidan, bölgədəki təhdidlərin ölkələri daha sıx əməkdaşlığa məcbur etdiyini bildirib.
“Misir və Səudiyyə Ərəbistan başda olmaqla, Türkiyənin həqiqətən də bölgə ölkələri ilə ortaq təhlükəsizlik məsələsini ən az iqtisadiyyat, ticarət və texnologiya qədər masaya yatırması lazımdır”- deyə nazir qeyd edib.
