BAKI, AzerVoice, Nailə Babazadə
Türkiyə Prezidenti Rəcəb Tayyib Ərdoğan Birləşmiş Millətlər Təşkilatının (BMT) 80-ci Baş Assambleyası çərçivəsində səfərdə olduğu ABŞ-ın Nyu-York şəhərində diplomatik fəaliyyətlərini davam etdirir.
AzerVoice xəbər verir ki, Ərdoğan, Nyu-Yorkdakı Türk Evinə yerləşən diplomatik nümayəndəlikdə Suriya Prezidenti Əhməd əş-Şəraa ilə görüş keçirib.
Görüş zamanı Türkiyə ilə Suriya arasında ikitərəfli münasibətlər və regional məsələlər müzakirə olunub.
Prezident Ərdoğan, Suriyaya tətbiq olunan bütün sanksiyaların ən qısa zamanda ləğv ediləcəyinə ümid etdiklərini bildirib. O vurğulayıb ki, Türkiyə Suriyanın ərazi bütövlüyü və suverenliyinə əsaslanan, bu məqsədi daşıyan bütün təşəbbüslərə müsbət yanaşır.
O, həmçinin Suriya Demokratik Qüvvələrinin (SDQ) 10 Mart razılaşmasına riayət etməli olduğunu, Türkiyənin bölgədəki prosesləri yaxından izlədiyini və Suriyaya dəstəyin artaraq davam edəcəyini qeyd edib.
Görüşdə Suriya Xarici İşlər Naziri Əsəd Şeybani və Türkiyə Milli İstihbarat Təşkilatının (MİT) rəhbəri İbrahim Kalın da iştirak ediblər.
Ərdoğan eyni zamanda Türk Evi binasında ABŞ-Türkiyə Biznes Şurasının sədri Hamdi Ulukaya, şura üzvləri və ABŞ-ın aparıcı şirkətlərinin yüksək vəzifəli rəhbərləri ilə də görüşüb.
Bu görüşdə Türkiyənin Energetika və Təbii Sərvətlər naziri Alparslan Bayraktar, Xəzinə və Maliyyə naziri Mehmet Şimşek, Səhiyyə naziri Kemal Memişoğlu, Sənaye və Texnologiya naziri Mehmet Fatih Kacır, Ticarət naziri Ömər Bolat, Prezidentin Kommunikasiya İdarəsinin rəhbəri Burhanəddin Duran, Prezidentin Xüsusi Katibliyinin rəhbəri Həsən Doğan, Müdafiə Sənayesi İdarəsinin sədri Haluk Görgün və Prezidentin xarici siyasət və təhlükəsizlik üzrə baş müşaviri səfir Akif Çağatay Kılıç da iştirak ediblər.
