BAKI, AzerVoice, Nailə Babazadə
Türkiyə Milli Müdafiə Nazirliyinin (MSB) mənbələri, Qəzzada əldə olunan atəşkəs razılaşmasından sonra bölgədə təhlükəsizliyin təmin edilməsi üçün Beynəlxalq Sabitlik Gücünün (ISF) yaradılmasının planlaşdırıldığını açıqlayıb.
AzerVoice xəbər verir ki, Türkiyə MN-nin həftəlik mətbuat konfransında jurnalistlərin suallarını cavablandıran nazirlik rəsmiləri, Qəzzada fəaliyyət göstərəcək bu qüvvədə Türk hərbçilərinin iştirak edib-etməyəcəyi barədə suallara cavab verib.
“Qəzzada iki ildir davam edən humanitar faciə nəzərə alınaraq, bölgəyə təcili humanitar yardımın çatdırılması və dağılan infrastrukturun yenidən qurulması prioritetdir. Bu məqsədlə Qəzza üzrə yaradılacaq tapşırıq qüvvəsinə qoşulmaq üçün əlaqələrimiz davam edir.” - deyə qeyd edilib.
Bildirilib ki, bu istiqamətdə Mülki-Hərbi Koordinasiya Mərkəzi (CMCC) qurulub. Bu quruma bağlı olaraq, təhlükəsizlik patrulları, mülki infrastrukturun qorunması, humanitar yardım, sərhəd təhlükəsizliyi, yerli təhlükəsizlik qüvvələrinin təlimi və atəşkəsin izlənməsi kimi vəzifələr veriləcək.
