BAKI, AzerVoice, Nailə Babazadə
Türkiyə Prezidenti Rəcəb Tayyib Ərdoğan Almaniya Kansleri Fridrix Merts ilə görüşdən sonra keçirilən birgə mətbuat konfransında Türkiyə-Almaniya münasibətlərinin strateji əhəmiyyətini vurğulayıb. Ərdoğan bildirib ki, güclü əsaslara və çoxsahəli əlaqələr şəbəkəsinə malik Türk-Alman əməkdaşlığı Avropa və qonşu bölgələrin təhlükəsizliyi üçün vazkeçilməzdir.
AzerVoice xəbər verir ki, o, iki yaxın NATO müttəfiqi olaraq Türkiyə və Almaniyanın ortaq maraqlar əsasında ikitərəfli münasibətləri və beynəlxalq məsələləri müzakirə etdiyini qeyd edib. Ərdoğan Avropa İttifaqına tam üzvlük hədəfi ilə bağlı gözləntilərini də ifadə edib və bu istiqamətdə qətiyyətli iradənin birlik tərəfindən düzgün qiymətləndirilməsinin sürətli nəticələr verə biləcəyini vurğulayıb.
Prezident həmçinin bildirib ki, Almaniya Türkiyənin Avropadakı ən böyük ticarət tərəfdaşıdır və ticarət həcmi 50 milyard dollara çatıb. Yaxın gələcəkdə bu həcmin 60 milyard dollara yüksəldilməsi hədəflənir. Ərdoğan, Almaniyada yaşayan türk icmasının ölkələr üçün əhəmiyyətini vurğulayaraq, onların mədəniyyət, kimlik və dəyərlərinin qorunmasının önəmli olduğunu qeyd edib.
Mətbuat konfransında Türkiyə ilə Almaniya arasındakı iqtisadi, ticarət və müdafiə əməkdaşlığı sahələrində birgə layihələrin inkişaf etdirilməsinə də diqqət çəkilib. Ərdoğan bildirib ki, Türkiyə-Alman əməkdaşlığı gələcəkdə də güclü şəkildə davam etdiriləcək.
