BAKI,AzerVoice, Fərid Mikayılov
Türkiyə Daxili İşlər Nazirliyi, Ankara Böyükşəhər Bələdiyyəsi (ABB) tərəfindən həyata keçirilən konsert xərcləri ilə bağlı iddialar çərçivəsində, ABB sədri Mansur Yavaş və Xüsusi Katib Nevzat Uzunoğlu haqqında vəzifə səlahiyyətlərini sui-istifadə və nəzarət vəzifəsini yerinə yetirməmək ittihamları ilə araşdırma aparılması üçün icazə verib.
AzerVoice xəbər verir ki, Ankara Baş Prokurorluğu, ABB-nin konsert xərclərinə dair aparılan araşdırmaların nəticəsinə əsasən Yavaş və Uzunoğlu ilə bağlı iddiaları qiymətləndirərək, daxili işlər nazirliyindən araşdırma icazəsi istəmişdi.
Nazirlik icazə verərək, araşdırmanın rəsmi şəkildə başlamasına şərait yaradıb.
Araşdırmalar göstərir ki, ABB-də 32 konsert xidməti alımı nəticəsində idarə 154 milyon 453 min 221 türk lirəsi zərərə uğrayıb. MASAK və Hesablama Palatasının yoxlamaları, eləcə də ekspert rəyləri, maliyyə əməliyyatlarında ciddi uyğunsuzluqların olduğunu göstərib.
Araşdırma çərçivəsində 23 sentyabrda, aralarında keçmiş bələdiyyə məmurları və şirkət rəhbərlərinin də olduğu 14 şübhəli, “vəzifə səlahiyyətlərini sui-istifadə” və “tenderə müdaxilə” ittihamları ilə saxlanmışdı.
Polisdə ifadə verildikdən sonra şübhəlilər Ankara Məhkəməsinə gətirilmiş və məhkəməyə təqdim edilmişdi. Hakimlik tərəfindən 5 şübhəli “zimmət” və “dövlət qurumlarının tenderlərinə müdaxilə” ittihamı ilə həbs edilmiş, qalan 9 şübhəli isə məhkəmə tərəfindən sərbəst buraxılmışdı.
