BAKI, AzerVoice, Nailə Babazadə
Türk dövlətləri ilə xarici ticarət həcmini 100 milyard dollara çatdırmağı hədəfləyirik.
AzerVoice xəbər verir ki, Türkiyə Prezidenti Rəcəb Tayyib Ərdoğan bu fikirləri Ankarada keçirilən AK Partiya Türk Dünyası Vizyon Sənədinin Təqdimat Proqramında çıxışı zamanı səsləndirib.
Ərdoğan bildirib ki, Türkiyənin Türk dövlətləri ilə xarici ticarət dövriyyəsinin orta müddətdə 60 milyard dollara, uzunmüddətli perspektivdə isə 100 milyard dollara çatdırılması qarşıya qoyulan əsas hədəflərdəndir.
Prezident əlavə edib ki, bu məqsədə nail olmaq üçün ticarət əlaqələrinin genişləndirilməsi, investisiya mühitinin yaxşılaşdırılması və enerji layihələrinin gücləndirilməsi ilə yanaşı, nəqliyyat və logistika strategiyaları da önəmli rol oynayacaq. Bakıdan Naxçıvana uzanan dəhliz və Xəzər vasitəsilə keçən yolların bütünləşdirilməsi sistem halına gətiriləcək, bu da Türk dövlətləri arasındakı ticarət axınını sürətləndirəcək.
Eyni zamanda, dil, tarix, ədəbiyyat və incəsənət sahəsində çoxsəviyyəli layihələr mədəni bağların möhkəmləndirilməsinə, gənclər proqramları, mübadilə mexanizmləri və ortaq akademik şəbəkələrin yaradılması isə gələcək nəsillərin bir-birini daha yaxşı tanımasına və əlaqələrin davamlılığına xidmət edəcək.
