BAKI, AzerVoice, Orxan Qədirzadə
Türkiyədə narkotiklə bağlı aparılan istintaq çərçivəsində həbs olunan Habertürk kanalının keçmiş baş redaktoru Mehmet Akif Ersoy və daha 9 şübhəli ilə bağlı Məhkəmə-Tibbi Ekspertiza Qurumu tərəfindən aparılan testlərin nəticələri açıqlanıb.
AzerVoice xəbər verir ki, İstanbul Respublika Baş Prokurorluğunun apardığı istintaq çərçivəsində “istifadə məqsədilə narkotik və ya psixotrop maddə alma”, “qəbul etmək və ya saxlamaq”, həmçinin “narkotik maddə istifadəsinə şərait yaratmaq” maddələri üzrə həbs edilən 10 şübhəlidən saç və qan nümunələri götürülüb.
Məhkəmə-Tibbi Ekspertiza Qurumu tərəfindən aparılan analizlərin nəticələrinə əsasən, Mehmet Akif Ersoy və daha altı nəfərin – Ela Rumeysa Cebeci, Ufuk Tetik, Şevkiye Dilara Yıldız, Mustafa Manaz, Ebru Gülan və Buse Öztayın narkotik testlərinin “müsbət” olduğu bildirilib.
Rəsmi məlumatlara görə, Mehmet Akif Ersoyun saç nümunələrində “marixuana və onun metabolitləri” aşkar edilib. Bununla yanaşı, Ersoyun qan nümunələrində hər hansı narkotik maddəyə rast gəlinmədiyi qeyd olunub.
Spiker Ela Rumeysa Cebecinin saç nümunələrində isə “marixuana, sintetik narkotiklər, kokain və metabolitləri”nin tapıldığı, qan analizlərində isə narkotik maddə izinə rast gəlinmədiyi bildirilib.
İstintaq çərçivəsində digər şübhəlilərlə bağlı hüquqi prosedurların davam etdiyi bildirilir.
Mehmet Akif Ersoy test nəticələrinin ictimaiyyətə açıqlanmasından sonra verdiyi açıqlamada ““ifadələrinin məqsəddən kənara çıxdığını”” bildirib və məsələ ilə bağlı hüquqi prosesin nəticəsini gözlədiyini qeyd edib.
Qeyd edək ki, istintaq davam etdiyi üçün şübhəlilər barəsində yekun məhkəmə qərarı hələ verilməyib.
