BAKI, AzerVoice, Nailə Babazadə
Türkiyə Prezident Administrasiyasının Kommunikasiya İdarəsinin rəhbəri Burhanəddin Duran İsrail hökumətini tənqid edib. O, sosial şəbəkə hesabında paylaşdığı açıqlamada İsrailin bölgədə sülhü pozan əsas qüvvələrdən biri olduğunu bildirib və Türkiyənin Fələstin xalqına dəstəyinin davam edəcəyini vurğulayıb.
AzerVoice xəbər verir ki, Duran qeyd edib ki, israilli rəsmilərin bölgədə başqalarının “imperialist niyyətləri”ndən danışması, yaxın keçmişdə tarixin ən ağır soyqırımlarından birini həyata keçirmiş olmaları fonunda ciddi ziddiyyət təşkil edir. Onun sözlərinə görə, bölgəni qeyri-sabitliyə sürükləyən bir güc olan İsrailin Türkiyənin gücü və nüfuzuna qarşı uzun müddətdir davam edən isterik yanaşması yalnız gülünc kimi qiymətləndirilə bilər.
Açıqlamada vurğulanıb ki, Prezident Rəcəb Tayyib Ərdoğanın liderliyi ilə Türkiyə sülh və sabitliyin təminatçısına çevrilib. Buna qarşılıq, Netanyahu hökuməti bölgəyə qan və göz yaşı gətirib. İsrail hökumətinin Fələstin və Suriyada işğalçı siyasətini davam etdirdiyi, yayılmacı niyyətlərini isə guya milli təhlükəsizlik bəhanələri ilə ört-basdır etməyə çalışdığı bildirilib.
Burhanəddin Duran son iki il ərzində İsrailin Yaxın Şərqdə təxminən yeddi ölkəyə hücum etdiyini xatırladaraq, Netanyahu rəhbərliyinin təkcə region üçün deyil, İsrail xalqı üçün də tam mənada fəlakət olduğunu qeyd edib. O, hazırda həmin rəhbərliyin Türkiyəyə yönələn hücumlarla törətdiyi cinayətlərin üstünü örtmək və diqqəti başqa istiqamətə çəkmək istədiyini bildirib.
Açıqlamanın sonunda Duran vurğulayıb ki, Türkiyə sülh və sabitlik arzulayan hər kəsin yanında qətiyyətlə dayanmağa davam edəcək. O əlavə edib ki, İsrail Baş nazirinin gülünc açıqlamaları və bu kimi ucuz cəhdlər Türkiyəni Fələstinli qardaşlara verdiyi dəstəkdən heç vaxt çəkindirə bilməz.
“Barışı məhv etməyə çalışanlara baxmayaraq, sülh mütləq qalib gələcək.” - deyə Duran qeyd edib.
