BAKI,AzerVocie, Orxan Qədirzadə
Türkiyənin Milli Kəşfiyyat Təşkilatının (MİT) rəhbəri İbrahim Kalın Ukraynanın Milli Təhlükəsizlik və Müdafiə Şurasının katibi Rustem Umerov ilə Ankarada görüş keçirib.
AzerVocie-un verdiyi məlumata görə, görüşdə Rusiya–Ukrayna müharibəsinin cari vəziyyəti, münaqişənin regional və qlobal təsirləri, sülh istiqamətində atıla biləcək addımlar, eləcə də əsir mübadiləsi məsələləri ətraflı şəkildə müzakirə olunub.
Tərəflər Ukrayna ərazisində mövcud təhlükəsizlik vəziyyətinə dair qiymətləndirmələr aparıb. Görüş zamanı Rusiya ilə Ukrayna arasında davam edən hərbi qarşıdurmanın yalnız iki ölkə ilə məhdudlaşmadığı, eyni zamanda regional və qlobal miqyasda ciddi siyasi, təhlükəsizlik və geosiyasi gərginlik yaratdığı qeyd olunub.
Danışıqlarda müharibənin dayandırılması və sülhün təmin olunması üçün mümkün diplomatik və praktiki addımlar, aparılan danışıqlar prosesində əldə olunan son nəticələr, həmçinin mövcud regional şərait nəzərə alınmaqla irəliləyiş imkanları müzakirə edilib.
Bununla yanaşı, Ukraynanın Rusiya ərazisində saxlanılan müharibə əsirlərinin azad edilməsi və qarşılıqlı əsir mübadiləsi məsələsi də görüşün əsas mövzuları sırasında yer alıb.
Görüşdə Türkiyə ilə Ukrayna arasında mövcud əməkdaşlıq mexanizmləri çərçivəsində sistemli birgə fəaliyyətin davam etdirilməsinin vacibliyi vurğulanıb və bu istiqamətdə təmasların saxlanılması barədə razılıq əldə olunub.
