BAKI, AzerVoice
Türkiyənin daxili işlər naziri Ali Yerlikaya son iki həftə ərzində Jandarma qüvvələri tərəfindən silah və sursat qaçaqmalçılığına qarşı keçirilən əməliyyatların nəticələrini açıqlayıb.
O qeyd edib ki, Respublika Baş Prokurorluqları və Jandarma Asayiş Dairə Başkanlığının koordinasiyası ilə Jandarma Komandanlıqları tərəfindən İstanbul, Antalya, Diyarbəkir, Adana, Van, Afyonkarahisar, Zonguldak, İzmir, Hakkari, Çorum, Kocaeli, Rize, Mersin və Konya vilayətlərində əməliyyatlar həyata keçirilib.
“Əməliyyatlar çərçivəsində 398 ədəd lisenziyasız tapança, 175 ədəd lisenziyasız ov tüfəngi və 32 ədəd uzun lüləli silah müsadirə edilib, 202 şübhəli şəxs saxlanılıb”-deyə Nazir sosial şəbəkə paylaşımında bildirib.
Nazir bildirib ki, bu addımlar lisenziyasız silahlarla törədilə biləcək cinayətlərin qarşısını almaqla yanaşı, ictimai asayişi pozan dəstələrə və mütəşəkkil cinayət qruplarına silah tədarükünün də qarşısını alıb.
Yerlikaya vurğulayıb ki, silah və sursat qaçaqmalçılığına qarşı mübarizə yalnız qanunsuz ticarətin deyil, bu silahlarla törədilə biləcək bütün cinayətlərin qarşısının alınmasına yönəlib və əməliyyatlarda iştirak edən əməkdaşları təbrik edib.
