BAKI,AzerVoice, Orxan Qədirzadə
Türkiyə Prezidenti Rəcəb Tayyib Ərdoğan Ankaranın ABŞ-ın rəhbərliyi ilə həyata keçirilən F-35 döyüş təyyarələri proqramına yenidən qaytarılmasının vacib olduğunu bəyan edib.
AzerVoice xəbər verir ki, Ərdoğan bu fikirləri Bloomberg agentliyinə müsahibəsində səsləndirib. Onun sözlərinə görə, Türkiyə artıq ödənişini etdiyi F-35 təyyarələrini almalı və proqramdakı iştirak hüquqları bərpa olunmalıdır.
“Türkiyənin artıq vəsait ödədiyi F-35 təyyarələrini alması və proqramdakı iştirakının bərpa edilməsi həm vacib, həm də zəruridir. Bu addım Türkiyə-ABŞ münasibətlərinin möhkəmlənməsinə və NATO-nun təhlükəsizliyinin artırılmasına töhfə verəcək”, - deyə dövlət başçısı bildirib.
Prezident qeyd edib ki, bu mövqeyini sentyabr 2025-ci ildə Ağ Evdə ABŞ Prezidenti Donald Trump ilə görüşü zamanı şəxsən çatdırıb. Ərdoğan Türkiyənin Rusiya istehsalı olan silah sistemləri aldığına görə F-35 proqramından çıxarılmasını “ədalətsiz qərar” adlandırıb.
Onun sözlərinə görə, Trampın yenidən prezident seçilməsi Ankara ilə Vaşinqton arasında münasibətləri daha məntiqli və konstruktiv müstəviyə qaytarmaq üçün imkan yaradıb.
ABŞ-da Türkiyənin dövlət bankı Halkbank-a qarşı qaldırılmış cinayət işi ilə bağlı danışan Ərdoğan, ittihamların əsassız olduğunu bildirib. O qeyd edib ki, Türkiyə tərəfi bankın ədalətsiz sanksiyalarla üzləşməməsi üçün danışıqlar aparır və prosesin qanuna uyğun, ədalətli nəticələnəcəyinə ümid edir.
Enerji sahəsində əməkdaşlığa toxunan prezident Türkiyənin, xüsusilə ABŞ-dan mayeləşdirilmiş təbii qaz idxalını əhəmiyyətli dərəcədə artırdığını vurğulayıb. Ərdoğan bildirib ki, Ankara enerji təhlükəsizliyini milli maraqlar çərçivəsində qorumaq üçün ehtiyatlı və balanslaşdırılmış siyasət yürüdür.
Rusiya–Ukrayna müharibəsi ilə bağlı mövqeyini açıqlayan Ərdoğan qeyd edib ki, Türkiyənin hər iki tərəflə balanslı münasibətləri onu gələcək sülh danışıqları üçün potensial platformaya çevirir. O, Ankaranın mümkün atəşkəs razılaşmasının icrasına nəzarət prosesinə dəstək verməyə hazır olduğunu bildirib.
“Türkiyə həm Rusiya Prezidenti Vladimir Putin, həm də Ukrayna Prezidenti Volodemir Zelenski ilə birbaşa əlaqə saxlaya bilən yeganə ölkədir”, - deyə Ərdoğan vurğulayıb.
Prezident İsrailin Baş naziri Benjamin Netanyahu hökumətinin Fələstindəki siyasətini kəskin tənqid edib. Ərdoğan bildirib ki, Qəzza zolağında yaradılması planlaşdırılan beynəlxalq sabitləşdirmə qüvvələrinin Türkiyənin iştirakı olmadan legitimlik qazanması çətin olacaq.
Onun sözlərinə görə, Türkiyənin Fələstinlə tarixi əlaqələri, İsraillə keçmiş təhlükəsizlik və diplomatik kanalları, eləcə də NATO üzvü kimi regional təsiri Ankaranı bu cür missiyalar üçün əsas ölkəyə çevirir. Prezident əlavə edib ki, Türkiyə Qəzzada davamlı sülhün bərqərar olması üçün üzərinə düşən bütün məsuliyyəti götürməyə hazırdır.
