BAKI, AzerVoice, Nailə Babazadə
Türkiyə Milli Müdafiə Nazirliyi İrandakı son vəziyyətlə bağlı ölkənin şərq sərhədlərində görülən genişmiqyaslı təhlükəsizlik tədbirləri barədə məlumat yayıb.
AzerVoice xəbər verir ki, nazirliyin həftəlik brifinqində 560 kilometrlik İran sərhədinin hər cür hava və ərazi şəraitində 24 saat fasiləsiz qorunduğu bildirilib. Sərhəd xətti boyunca texnoloji vasitələrlə gücləndirilmiş fiziki təhlükəsizlik sistemlərinin qurulduğu və bölmələrin imkanlarının mütəmadi artırıldığı qeyd olunub.
Məlumata görə, İran sərhədində təhlükəsizliyi təmin etmək məqsədilə 203 elektro-optik qüllə və 43 liftli qüllənin quraşdırılması başa çatdırılıb. Eyni zamanda 380 kilometrlik modulyar beton divarın inşası və 553 kilometrlik xəndək qazma işləri tamamlanıb. Hazırda mövcud xəndəklərin maneə qabiliyyətinin artırılması istiqamətində işlər davam edir.
Nazirlik həmçinin bildirib ki, sərhəd xətti və yaxınlaşma istiqamətləri PUA (İHA/SİHA) və kəşfiyyat təyyarələri ilə daim nəzarətdə saxlanılır. Hazırda Türkiyə sərhədlərinə doğru kütləvi miqrasiya axını qeydə alınmasa da, mümkün risklərə qarşı bütün əlavə tədbirlərin hazır vəziyyətə gətirildiyi vurğulanıb.
