BAKI, VOA, Nailə Babazadə
Türkiyənin Batman şəhəri mərkəz olmaqla 10 müxtəlif vilayətdə keçirilən genişmiqyaslı əməliyyat nəticəsində qanunsuz mərc oyunları təşkil edən böyük şəbəkə çökdürülüb.
VOA xəbər verir ki, Batman Respublika Baş Prokurorluğunun kordinasiyası ilə həyata keçirilən təhqiqatlar zamanı məlum olub ki, cinayətkar qruplaşma virtual qumar saytlarından əldə edilən "çirkli pulları" müxtəlif bank hesablarına, oradan isə iz itirmək məqsədilə kripto pul hesablarına köçürərək yuyub.
Kiber Cinayətkarlıqla Mübarizə İdarəsinin apardığı araşdırmalar nəticəsində şəbəkənin miqyası hər kəsi heyrətə gətirib. Müəyyən olunub ki, 81 şübhəli şəxs 2 milyondan çox bank əməliyyatı vasitəsilə ümumilikdə 15 milyard 172 milyon 805 min 258 lirə məbləğində vəsait dövriyyəsi həyata keçirib.
Batman, İstanbul, Ankara, Antalya, İzmir, Sakarya, Kastamonu, Nevşehir, Mersin və Diyarbakırda təşkil edilən əməliyyatlara 105 xüsusi qrup və 350 polis əməkdaşı cəlb olunub. Eyni vaxtda həyata keçirilən reydlər nəticəsində 73 şübhəli şəxs saxlanılaraq istintaqa cəlb edilib.
Hazırda saxlanılan şəxslərin polis idarəsindəki ifadələri davam edir. Şəbəkənin digər 8 üzvünün tutulması istiqamətində isə axtarış tədbirləri fasiləsiz olaraq aparılır.
