BAKI, VOA, Nailə Babazadə
Türkiyə Prezidenti Rəcəb Tayyib Ərdoğan İtaliya baş naziri Georgia Meloni ilə telefon görüşməsi keçirib.
VOA xəbər verir ki, liderlər görüş zamanı Türkiyə–İtaliya ikitərəfli əlaqələri ilə yanaşı, regionda davam edən münaqişəli proseslərin gedişatı başda olmaqla, regional və qlobal məsələləri ətraflı müzakirə ediblər. Prezident Ərdoğan Türkiyə və İtaliya arasındakı əməkdaşlığı ticarət sahəsi başda olmaqla, hər bir istiqamətdə daha da irəliyə aparmaq üçün çalışdıqlarını ifadə edib.
Görüşün əsas mövzularından biri İrandakı son hadisələr və onların regiona təsirləri olub. Prezident Ərdoğan Türkiyənin bu prosesləri yaxından izlədiyini və sabitliyi pozan addımlardan qaçınılması üçün tərəflərə lazımi tövsiyələrin verildiyini bildirib. O, Türkiyə olaraq diplomatiya zemininin gücləndirilməsinin tərəfdarı olduqlarını və beynəlxalq birliyin bu istiqamətdə birgə fəaliyyət göstərməsinin zəruriliyini vurğulayıb. Ərdoğan qeyd edib ki, hazırkı münaqişəli proses qlobal təhlükəsizliyi də risk altına qoyan ciddi təhdidlər daşıyır.
Həmçinin görüşdə regionda və dünyada baş verən qarşıdurmaların NATO müttəfiqləri arasında, xüsusilə müdafiə sənayesi sahəsində əməkdaşlığın artırılmasının əhəmiyyəti bir daha gündəmə gətirilib. Prezident Ərdoğan qeyd edib ki, müasir çağırışlar müttəfiqlərin müdafiə imkanlarını koordinasiyalı şəkildə gücləndirməsini qaçınılmaz edir. Bu baxımdan, Türkiyə və İtaliyanın birgə layihələri həm regional sabitlik, həm də alyansın gücü üçün mühüm töhfə kimi qiymətləndirilib.
