BAKI,VOA, Fərid Mikayılov
Türkiyədə bu il beşinci dəfə keçiriləcək Strateji Kommunikasiya Zirvəsində (STRATCOM) Yaxın Şərqdəki müharibə və beynəlxalq sistemdə baş verən dəyişikliklər geniş müzakirə olunacaq.
VOA xəbər verir ki, Prezident Administrasiyasının Kommunikasiya İdarəsi tərəfindən təşkil edilən zirvə martın 27-28-də İstanbulda keçiriləcək.
Tədbirdə Türkiyə vitse-prezidenti Cevdet Yılmaz, xarici işlər naziri Hakan Fidan, Milli Kəşfiyyat Təşkilatının rəhbəri İbrahim Kalın, eləcə də 10 ölkədən 11 nazir və 60-dan çox yüksək səviyyəli rəsmi iştirak edəcək.
“Beynəlxalq sistemdə qırılma: böhranlar, narrativlər və yeni nizam axtarışı” mövzusunda keçiriləcək zirvədə qlobal böhranlar, geosiyasi dəyişikliklər və yeni dünya düzəni ilə bağlı yanaşmalar müzakirə olunacaq.
Türkiyə Prezident Administrasiyasının Kommunikasiya rəhbəri Burhanəddin Duran bildirib ki, məqsəd strateji kommunikasiyanın gücündən istifadə edərək beynəlxalq əməkdaşlığı gücləndirmək və ortaq yanaşmalar formalaşdırmaqdır.
Zirvə çərçivəsində artan geosiyasi gərginliklər, iqtisadi qeyri-sabitlik və qlobal narrativ rəqabəti ilə yanaşı, Yaxın Şərqdəki müharibə də əsas müzakirə mövzularından biri olacaq.
İki gün davam edəcək tədbirdə həmçinin lider diplomatiyası, rəqəmsal kommunikasiya, iqlim diplomatiyası, müdafiə sənayesi, qlobal təhlükəsizlik, süni intellektin rolu və münaqişə zonalarında informasiya mübarizəsi kimi mövzular da diqqət mərkəzində olacaq.
