BAKI, VOA, Nailə Babazadə
Türkiyə Xarici İşlər Nazirliyi Livanın cənubunda BMT-nin Müvəqqəti Sülhməramlı Qüvvələrinin (UNIFIL) heyətinə qarşı həyata keçirilən və İndoneziyadan olan üç hərbçinin ölümü, bir çoxunun isə yaralanması ilə nəticələnən hücumları kəskin şəkildə qınayan bəyanat yayıb.
VOA xəbər verir ki, nazirliyin yazılı açıqlamasında hadisə ilə bağlı İndoneziya hökumətinə və xalqına başsağlığı verilib. Bəyanatda vurğulanıb ki, BMT təsisatlarına və sülhməramlı personala qarşı törədilən bu cür hərəkətlər beynəlxalq hüququn kobud şəkildə pozulmasıdır və bu cinayətin icraçıları mütləq ədalət qarşısında cavab verməlidirlər.
Xarici siyasət idarəsi İsrailin Livandakı hərbi fəaliyyətini işğalçılıq kimi xarakterizə edərək, bu addımların regionda müharibənin miqyasının genişlənməsinə və qeyri-sabitliyin daha da dərinləşməsinə yol açdığını bildirib. Türkiyə tərəfi beynəlxalq birliyə müraciət edərək, İsrailin yayılmaçı siyasətinə və hücumlarına son qoyulması üçün təsirli tədbirlər görməyə çağırıb. Açıqlamada qeyd olunur ki, sülhməramlıların hədəf alınması bölgədəki humanitar və diplomatik missiyaların fəaliyyətini ciddi risk altına qoyur.
Xatırladaq ki, martın 2-də İsrail ordusunun Livanın şimalından atılan raketləri əsas gətirərək başlatdığı genişmiqyaslı hava və dəniz əməliyyatları artıq quru işğalı mərhələsinə keçib. Livan Səhiyyə Nazirliyinin son məlumatlarına görə, hücumlar nəticəsində 1247 nəfər həyatını itirib. Ölkənin Afət İdarəetmə Qurumu isə İsrailin işğalı səbəbindən məcburi köçkünə çevrilən livanlıların sayının 1 milyon 162 min nəfəri keçdiyini rəsmən təsdiqləyib. Paytaxt Beyrut da daxil olmaqla, ölkənin bir çox yaşayış məntəqələri intensiv bombardmanlara məruz qalmaqda davam edir.
