BAKI,VOA
ASELSAN tərəfindən yayımlanan 2025-ci il üzrə Fəaliyyət Hesabatı çərçivəsində, müdafiə sahəsində xaricdən asılılığın azaldılması məqsədilə həyata keçirilən milliləşdirmə işlərinin 2025-ci ildə də uğurla davam etdirildiyi bildirilib.
Sektordakı öncü mövqeyini qoruyan ASELSAN və tədarükçülərinin gərgin əməyi nəticəsində 2025-ci ildə 103 məhsul milliləşdirilib. Bununla da, 2018-ci ildən bu günə qədər milliləşdirilən məhsulların ümumi sayı 982-yə çatıb.
Milliləşdirilmiş məhsullar üçün 2025-ci ildə verilən 235 milyon dollar məbləğində satınalma sifarişi ilə ASELSAN, son 7 il ərzində 1 milyard dollardan çox vəsaitin Türkiyə sərhədləri daxilində qalmasına töhfə verib. Bundan əlavə, 2025-ci ildə yerli məhsullar sayəsində xarici analoqlarla müqayisədə 80 milyon dollar məbləğində qənaət əldə edilib. Hazırda 30 tədarükçü ilə daha 340 məhsulun milliləşdirilməsi istiqamətində işlər davam edir.
ASELSAN milliləşdirmə strategiyası ilə bağlı verdiyi açıqlamada:“Milliləşdirmə bir seçim deyil, məcburiyyətdir anlayışı ilə kritik, yüksək texnologiya yönümlü, embarqo və ixrac məhdudiyyəti olan məhsullar prioritet olmaqla, ASELSAN-ın milliləşdirmə işləri davam etdiriləcəkdir.”-deyə bildirib.
ASELSAN tədarük zənciri idarəetməsi
ASELSAN 2025-ci ildə tədarük zənciri proseslərində milliləşdirmə, sadələşdirmə və rəqəmsallaşma mərkəzli mühüm təkmilləşdirmələr həyata keçirib. Qərar qəbul etmə sürətini və izlənilə bilənliyi artıran bu tətbiqlər "Supply Chain Professionals Club" tərəfindən "İlin Layihəsi" və "Ən İnnovativ Layihə" kateqoriyalarında mükafatlara layiq görülüb. Həmçinin ASELSAN-ın Tədarük Zənciri İdarəetməsi təşkilatı, ən güclü və təsirli tədarük zəncirləri sıralamasında 8-ci yerdə qərarlaşıb.
5 milyard dollarlıq ekosistem həcmi
3300-ü Türkiyə daxilində olmaqla, cəmi 5500 tədarükçü ilə işləyən ASELSAN-ın ekosistemə ötürdüyü iş həcmi 2025-ci ildə %82 artaraq 5 milyard dolları keçib. Son 5 illik qiymətləndirmədə bu artımın yalnız kəmiyyət deyil, həm də yüksək texnoloji yerli məhsullar hesabına keyfiyyət baxımından da dəstəkləndiyi görünür. Bundan əlavə, "Tədarükçü Maliyyələşdirmə Sistemi" vasitəsilə 36 tədarükçü şirkətə 11 bank vasitəsilə 44 milyon dollar məbləğində resurs ayrılıb.
