BAKI,VOA, Fərid Mikayılov
Türkiyənin müdafiə sənayesi şirkəti ASELSAN KORKUT sistemi üzrə yeni texnoloji və istehsal nailiyyətlərini açıqlayıb.
VOA xəbər verir ki, şirkətin 2025-ci il üzrə fəaliyyət hesabatında KORKUT hava müdafiə sisteminin əldə etdiyi texnoloji irəliləyişlər və həyata keçirilən layihələr geniş şəkildə təqdim olunub. Hesabatda sistemin həm yerli, həm də beynəlxalq səviyyədə bir sıra ilk nailiyyətlərə imza atdığı vurğulanıb.
Bildirilib ki, KORKUT 240/35 və KORKUT 250/35 modelləri üzrə yerli ehtiyacların qarşılanması məqsədilə yeni hava müdafiə müqaviləsi imzalanıb və bununla da sistemin kütləvi istehsal mərhələsində mühüm mərhələyə keçilib.
Eyni zamanda, sistemin mobilliyini artırmaq üçün hazırlanmış KORKUT 140/35 modelinin 8×8 təkərli taktiki platforma üzərində ilk atış sınaqları uğurla başa çatdırılıb. Testlər zamanı yüksək dəqiqlik nümayiş etdirən sistemin əməliyyat imkanlarını təsdiqlədiyi qeyd olunub.
Şirkət həmçinin bildirib ki, KORKUT 141/35 sisteminin Yaxın Şərqdə fəaliyyət göstərən bir şirkətin platformasına inteqrasiyası uğurla tamamlanıb və son istifadəçilər üçün yerində geniş sınaq təqdimatları keçirilib.
Yerli tədarük istiqamətində isə KORKUT 130/FCS və KORKUT 130/35 konfiqurasiyalarının hərbi birliklərə çatdırılması plan üzrə davam edir. Qeyd olunub ki, sistemə beynəlxalq maraq artmaqda davam edir və müxtəlif ölkələrdən gələn hərbi nümayəndə heyətləri üçün təqdimat və sınaq tədbirləri təşkil olunur.
