BAKI,VOA Orxan Qədirzadə
Türkiyənin Baykar şirkəti ilə İtaliyanın Leonardo müdafiə və aviasiya şirkəti Böyük Britaniyada keçiriləcək Farnborough Airshow sərgisində insanlı və insansız döyüş platformalarının birgə fəaliyyətinə dair əməkdaşlığın son nəticələrini beynəlxalq ictimaiyyətə təqdim edəcək.
Şirkətlər sərgi çərçivəsində keçiriləcək brifinqdə Türkiyədə M-346 təlim-döyüş təyyarəsi və Bayraktar KIZILELMA pilotsuz döyüş təyyarəsinin iştirakı ilə həyata keçirilən insanlı–insansız komanda fəaliyyəti (Manned-Unmanned Teaming – MUM-T) sınaqlarının nəticələri barədə məlumat verəcəklər.
Tədbirdə sınaqların növbəti mərhələsinə keçid çərçivəsində əldə olunan əsas nəticələr və qarşıdakı dövr üçün planlaşdırılan fəaliyyət istiqamətləri də açıqlanacaq.
Sərgidə həmçinin qısa uçuş-eniş zolaqlarından istifadə imkanına malik Bayraktar TB3 pilotsuz uçuş aparatı nümayiş etdiriləcək. TB3, Baykar və Leonardo tərəfindən yaradılmış LBA Systems birgə müəssisəsinin Avropa bazarına çıxış strategiyasında əsas platformalardan biri hesab olunur.
Bayraktar TB3-ün Farnborough Airshow-da təqdimatı iki şirkət arasındakı əməkdaşlığın yalnız sınaq mərhələsi ilə məhdudlaşmadığını, istehsala yaxın real platformalar üzərində də inkişaf etdiyini nümayiş etdirəcək.
Mütəxəssislərin fikrincə, dünyanın aparıcı aviasiya və müdafiə sərgilərindən biri olan Farnborough Airshow-un bu təqdimat üçün seçilməsi NATO müttəfiqləri və qlobal müdafiə sənayesi üçün strateji əhəmiyyət daşıyan mesaj kimi qiymətləndirilir.
Baykar və Leonardo arasında əməkdaşlığın əsası 2025-ci ilin mart ayında Romada imzalanmış anlaşma memorandumu ilə qoyulub. Həmin ilin iyun ayında isə Paris Airshow sərgisində tərəflər LBA Systems birgə müəssisəsinin yaradılması barədə rəsmi saziş imzalayıblar.
İtaliya mərkəzli və bərabər tərəfdaşlıq prinsipi əsasında fəaliyyət göstərən LBA Systems pilotsuz aviasiya sistemlərinin layihələndirilməsi, hazırlanması, istehsalı və texniki dəstəyi sahəsində fəaliyyət göstərir.
Əməkdaşlıq çərçivəsində Baykar qabaqcıl pilotsuz platformaların layihələndirilməsi və inkişafını həyata keçirir, Leonardo isə müasir elektron sistemlər, faydalı yüklər, insanlı–insansız inteqrasiya, sürü texnologiyaları, həmçinin sertifikatlaşdırma və kvalifikasiya proseslərinə cavabdehlik daşıyır.
