BAKI,VOA Orxan Qədirzadə

Türkiyədə kommersiya daşınmaz əmlak bazarında aktivlik 2026-cı ilin iyun ayında artıb. Türkiyə Statistika Qurumu (TÜİK) məlumatlarına əsasən, iyun ayında ölkə üzrə 16 min 565 iş yeri satılıb. Bu göstərici ötən ilin eyni ayı ilə müqayisədə 19,2 faiz artım göstərib.

Məlumata görə, iyun ayında satılan iş yerlərinin 5 min 126-sı ilk satış, 11 min 439-u isə ikinci əl satış kateqoriyasına aid olub. İlk satışlar illik müqayisədə 30,8 faiz, ikinci əl iş yerlərinin satışı isə 14,6 faiz artıb.

İpoteka yolu ilə alınan iş yerlərində də ciddi yüksəliş qeydə alınıb. İyun ayında 745 iş yeri ipoteka ilə satılıb ki, bu da ötən ilin eyni dövründən 86,7 faiz çoxdur. Digər satış formaları ilə həyata keçirilən iş yeri satışları isə 15 min 820 təşkil edib və illik müqayisədə 17,2 faiz artıb.

2026-cı ilin yanvar–iyun aylarında Türkiyədə ümumilikdə 85 min 528 iş yeri satışı həyata keçirilib. Bu rəqəm ötən ilin eyni dövründəki 90 min 306 satışla müqayisədə 5,3 faiz azdır. Altı aylıq dövrdə ipoteka ilə iş yeri satışları isə 66,6 faiz artaraq 4 min 5-ə yüksəlib.

Ekspertlərin qiymətləndirməsinə görə, iş yeri satışlarında artım Türkiyədə ticarət və xidmət sektoruna yönələn investisiya marağının davam etdiyini göstərir. Xüsusilə yeni tikili kommersiya obyektlərinə tələbin artması bazarda sahibkarların uzunmüddətli aktivlərə marağının yüksəldiyini göstərən əsas amillərdən biri hesab olunur.