BAKI,VOA Orxan Qədirzadə
Türkiyə Böyük Millət Məclisində (TBMM) Gələcək Partiyası, Səadət Partiyası və DEVA Partiyasının iştirakı ilə yaradılan “Yeni Yol” parlament qrupu qeyri-müəyyənliklə üzləşib. Gələcək Partiyasının sədri Əhməd Davudoğlunun partiyanın fəaliyyətini dayandırmaq qərarı qrupun gələcəyi ilə bağlı suallar yaradıb.
Davudoğlu iyulun 29-da sosial media hesabından yayımladığı açıqlamada Gələcək Partiyasının siyasi fəaliyyətini dayandırmaq qərarı verdiyini bildirib. O qeyd edib ki, bu addım siyasətdən geri çəkilmək deyil, siyasi fəaliyyətə fərqli yanaşma nümayiş etdirmək məqsədi daşıyır.
Gələcək Partiyasının ləğvi TBMM-də say baxımından həssas vəziyyətdə olan “Yeni Yol” qrupunun gələcəyini birbaşa təsir altına salıb.
Bir deputat ayrılığı qrupu dağıda bilər
TBMM-də parlament qrupu statusunu qorumaq üçün minimum 20 deputat tələb olunur. Hazırda “Yeni Yol”un 20 deputatı var.
Qrupda 8 Səadət Partiyası, 8 DEVA Partiyası və 4 Gələcək Partiyasından deputat təmsil olunur.
Gələcək Partiyasından olan 4 deputatdan yalnız birinin qrupdan ayrılması “Yeni Yol”un parlament qrupunu itirməsinə səbəb ola bilər.
Hazırda Gələcək Partiyası deputatlarından Selçuk Özdağ “Yeni Yol” daxilində fəaliyyətini davam etdirəcəyini açıqlayıb. Lakin digər üç deputat – Sema Silkin Ün, Cemalettin Kani Torun və Mustafa Bilicidən məsələ ilə bağlı rəsmi açıqlama gəlməyib.
Partiya mənbələri isə vəziyyətin hələ də qeyri-müəyyən olduğunu bildirirlər.
“Yeni Yol”un əvvəlki böhranları
“Yeni Yol” qrupu daha əvvəl də deputat itkiləri səbəbindən çətin vəziyyətlə üzləşib.
2023-cü il ümumi seçkilərindən sonra Gələcək Partiyası və Səadət Partiyası TBMM-də birgə fəaliyyət göstərmək üçün çətir qurmuşdu. Daha sonra DEVA Partiyasının da qoşulması ilə “Yeni Yol” yaradılmışdı.
Qrup əvvəlcə 24 deputatla fəaliyyətə başlasa da, istefalar nəticəsində deputat sayı 20-yə qədər azalıb.
Parlament qrupunu qorumaq TBMM-də siyasi görünürlük baxımından mühüm əhəmiyyət daşıyır. Qruplar parlamentdə söz almaq, qanun təklifləri təqdim etmək, qrup rəhbərliyi formalaşdırmaq və komissiyalarda daha güclü təmsil olunmaq imkanlarına malikdir.
Davudoğlunun qərarı siyasi balansı dəyişə bilər
Siyasi müşahidəçilər hesab edirlər ki, Gələcək Partiyasının fəaliyyətini dayandırması yalnız partiyanın daxili strukturlarına deyil, TBMM-dəki müxalifət balansına da təsir göstərə bilər.
“Yeni Yol”un gələcəyi isə Gələcək Partiyası deputatların mövqeyindən asılı olacaq.
