BAKI,VOA Orxan Qədirzadə
Türkiyə Milli Müdafiə Nazirliyi (MSB) Ankara ilə Bağdad arasında müdafiə və təhlükəsizlik sahəsində əməkdaşlığın fasiləsiz davam etdiyini açıqlayıb. Nazirlik bildirib ki, sərhəd təhlükəsizliyi və terrorla mübarizə istiqamətində yaradılan birgə mexanizmlər qətiyyətlə fəaliyyət göstərir.
MSB-nin mətbuat və ictimaiyyətlə əlaqələr üzrə müşaviri, nazirliyin sözçüsü kontr-admiral Zeki Aktürk Ankaradakı Gazi Fişek Zavodunda keçirilən həftəlik mətbuat brifinqində Türkiyənin terrorla mübarizə əməliyyatları və regional təhlükəsizlik məsələləri ilə bağlı açıqlamalar verib.
Aktürk bildirib ki, son bir həftə ərzində daha 4 PKK terrorçusu təslim olub. O qeyd edib ki, əməliyyat bölgələrində mina, əldəqayırma partlayıcı qurğular, mağara, sığınacaq və digər terror infrastrukturlarının aşkarlanması və məhv edilməsi istiqamətində fəaliyyət davam edir.
Türkiyə-İraq təhlükəsizlik əməkdaşlığı güclənir
MSB-dən verilən açıqlamada Türkiyə ilə İraq arasında müdafiə və təhlükəsizlik sahəsində əməkdaşlığın regional sabitlik baxımından mühüm əhəmiyyət daşıdığı vurğulanıb.
Nazirlik bildirib ki, İraq Baş nazirinin Türkiyəyə səfəri, Prezident Rəcəb Tayyib Ərdoğanın ev sahibliyi ilə keçirilən görüşlər və imzalanan razılaşmalar iki ölkə arasındakı əlaqələrin inkişafında mühüm mərhələdir.
“Türkiyə ilə İraq arasında son illərdə inkişaf etdirilən əməkdaşlıq terrorla mübarizədə əldə olunan uğurların əsas amillərindən biri olub. İraqla təhlükəsizlik sahəsində əməkdaşlıq fasiləsiz davam edir. Birgə mexanizmlər işlədilir, sərhəd təhlükəsizliyi və terrorla mübarizə istiqamətində koordinasiya qətiyyətlə həyata keçirilir”, - deyə açıqlamada qeyd olunub.
Sərhəddə 468 nəfər saxlanılıb
Türkiyə Müdafiə Nazirliyi sərhəd təhlükəsizliyi tədbirləri barədə də məlumat verib.
Bildirilib ki, son həftə ərzində qeyri-qanuni yollarla sərhədi keçməyə çalışan 468 nəfər saxlanılıb. Onlardan 4-nün terror təşkilatı üzvü olduğu müəyyən edilib. Bundan əlavə, 1 102 nəfərin sərhədi keçməsinin qarşısı alınıb.
Nazirliyin məlumatına görə, 2026-cı ilin əvvəlindən etibarən Türkiyə sərhədlərindən qanunsuz keçməyə cəhd edən 6 953 nəfər saxlanılıb, 43 878 nəfərin isə sərhədi keçməsi əngəllənib.
Müdafiə sənayesi və regional koordinasiya
MSB qeyd edib ki, əvvəlki görüşlərdə Türkiyə və İraq arasında sərhəd təhlükəsizliyi, terrorla mübarizə, müdafiə sənayesi sahəsində koordinasiya və əməkdaşlığın artırılması istiqamətində razılıqlar əldə olunub.
Açıqlamada bildirilib ki, son dövrdə iqtisadiyyat və enerji sahələrində əməkdaşlıq ön plana çıxsa da, təhlükəsizlik sahəsində yaradılmış mexanizmlər effektiv şəkildə fəaliyyətini davam etdirir.
Türkiyə Müdafiə Nazirliyi iki ölkə arasında əməkdaşlığın güclənməsinin regional sabitliklə yanaşı, İraq türkmənlərinin təhlükəsizliyi və rifahı baxımından da əhəmiyyətli olduğunu vurğulayıb.
