BAKI,VOA, Fərid Mikayılov
Türkiyə Milli Kəşfiyyat Təşkilatının (MİT) rəhbəri İbrahim Kalın Ankarada Suriyanın xarici işlər naziri Əsəd Həsən Şeybani ilə görüş keçirib.
VOA xəbər verir ki, Türkiyə təhlükəsizlik mənbələrinin məlumatına görə, görüşdə Türkiyə–Suriya münasibətlərinin inkişafı, ikitərəfli əməkdaşlıq istiqamətləri, qonşu ölkələrlə əlaqələr, regional sabitlik, Livandakı son vəziyyət və Suriya–Livan münasibətləri müzakirə olunub.
Tərəflər, həmçinin Suriyada müzakirə olunan "Milli Həmrəylik və İctimai Bütövlüyün Gücləndirilməsi haqqında" qanun layihəsinin mümkün təsirlərini nəzərdən keçiriblər.
Görüş zamanı Suriya Demokratik Qüvvələrinin (SDQ) ölkənin dövlət strukturlarına inteqrasiyası prosesinin gedişi və terrorla mübarizə sahəsində əməkdaşlığın gücləndirilməsi məsələlərinə xüsusi diqqət yetirilib.
Bildirilib ki, SDQ-nin inteqrasiyasının uğurla başa çatdırılması məqsədilə konstruktiv addımlar atılır. Eyni zamanda, Suriya hökumətinin ölkədə sabitliyin təmin edilməsi istiqamətində İŞİD terror təşkilatına qarşı mübarizəni qətiyyətlə davam etdirdiyi vurğulanıb.
Tərəflər ABŞ–İsrail–İran qarşıdurmasının regiona siyasi və iqtisadi təsirlərini, Suriyaya qarşı tətbiq olunan sanksiyaların və xarici investisiyaların mövcud vəziyyətini də müzakirə ediblər.
Görüşdə Suriyanın son dövrdə regionda baş verən münaqişələrdən kənarda qalmağa çalışdığı qeyd olunaraq, ölkənin yaxın keçmişdə müharibənin ağır nəticələrini yaşadığı və bu səbəbdən qonşu dövlətlərlə münasibətlərdə sülh və sabitliyi prioritet hesab etdiyi bildirilib.
