BAKI,VOA
Türkiyə Prezidenti Rəcəb Tayyib Ərdoğan 30 Avqust – Zəfər Bayramının 104-cü ildönümü münasibətilə müraciət yayıb. Ərdoğan Türkiyə vətəndaşlarını, Şimali Kipr türk xalqını və dünyanın müxtəlif ölkələrində yaşayan türkiyəliləri bayram münasibətilə təbrik edib.
VOA xəbər verir ki, Ərdoğan 30 Avqust zəfərinin Türkiyənin milli mübarizəsinin ən mühüm mərhələlərindən biri olduğunu bildirib. Onun sözlərinə görə, Baş Komandan Meydan Döyüşü ilə qazanılan Böyük Zəfər türk xalqının yaşadığı torpaqların əbədi vətəni olduğunu bir daha təsdiqləyib.
Türkiyə Prezidenti bildirib ki, 104 il əvvəl bütün çətinliklərə baxmayaraq nümayiş etdirilən əzm, cəsarət və qətiyyət bu gün də ölkə üçün əsas güc mənbələrindən biridir. O qeyd edib ki, Böyük Zəfər Türkiyə Cümhuriyyətinin yaradılmasına gedən yolu açmaqla yanaşı, türk xalqının əsarəti heç vaxt qəbul etməyəcəyini bütün dünyaya nümayiş etdirib.
Ərdoğan Türkiyənin tarixindən aldığı güc və özünəinamla energetikadan müdafiə sənayesinə, elm və texnologiyadan xarici siyasətə qədər müxtəlif sahələrdə qarşıya qoyulan məqsədlərə doğru irəlilədiyini vurğulayıb.
Prezident dünyada müharibələrin, qarşıdurmaların, böhranların və siyasi qeyri-müəyyənliyin artdığı bir dövrdə Türkiyənin prinsipial və insanı dəyərləri əsas götürən siyasət həyata keçirdiyini bildirib. Onun sözlərinə görə, Türkiyə zülmün kim tərəfindən törədilməsindən asılı olmayaraq onun qarşısını almağa, zərərçəkənlərə isə sahib çıxmağa çalışır.
Ərdoğan qədim türk ifadəsinə istinad edərək, “Üstdə mavi göy çökmədikcə, altda qonur yer deşilmədikcə” Türkiyəni və türk millətini müqəddəs mübarizəsindən heç kimin döndərə bilməyəcəyini vurğulayıb. O bildirib ki, bütün təxribatlara baxmayaraq, Türkiyə dövlət və xalq olaraq haqqın, hüququn, ədalətin, sülhün və sabitliyin tərəfində dayanmağa davam edəcək.
Türkiyə Prezidenti ölkənin birlik və həmrəylik şəraitində “Türkiyə Yüzili”nin qurulmasını davam etdirəcəyini bildirib. Ərdoğan çıxışının sonunda Böyük Zəfərin baş komandanı Qazi Mustafa Kamal Atatürkü və onun silahdaşlarını ehtiramla yad edib, şəhidlərə rəhmət diləyib və qazilərə minnətdarlığını ifadə edib.
