"Air Arabia" Şarja Beynəlxalq Hava Limanı ilə Polşanın Qdansk Lex Valensa Hava Limanını birləşdirən yeni birbaşa uçuş xəttinin açıldığını elan edib. 14 dekabr 2026-cı il tarixindən etibarən həftədə beş dəfə birbaşa reyslərlə həyata keçiriləcək yeni uçuşlar aviaşirkətin Polşa bazarındakı mövqeyini daha da möhkəmləndirəcək. Qdansk aviaşirkətin Şarcadan Varşava Şopen və Krakov şəhərlərinə mövcud uçuşlarına, habelə dekabr ayında başlayacaq Katovitse reyslərinə qoşulur.
Qdanskın şəbəkəyə daxil edilməsi ilə "Air Arabia" Şarjanı Polşanın dörd şəhəri ilə birləşdirəcək, sərnişinlərə ölkənin əsas istiqamətlərinə birbaşa və rahat səyahət imkanları təqdim edəcək, eyni zamanda BƏƏ ilə Polşa arasında artan turizm, biznes və iqtisadi əlaqələri dəstəkləyəcək.
"Avropadakı mövcudluğumuzu genişləndirməyə davam etdiyimiz bir vaxtda Qdanskı Polşadakı böyüyən şəbəkəmizə əlavə etməkdən məmnunuq. Yeni xidmət Şarcanı mühüm beynəlxalq istiqamətlərlə birləşdirmək, eyni zamanda müştərilərimizə etibarlı və sərfəli səyahət seçimləri təqdim etmək öhdəliyimizi əks etdirir. Həftədə beş birbaşa uçuş həm istirahət, həm də işgüzar səfərləri dəstəkləyəcək, BƏƏ ilə Polşa arasında genişlənən əlaqələrə töhfə verəcək".-deyə , Aviaşirkətin Qrup üzrə Baş İcraçı Direktoru Adil əl-Əli bildirib.
Qdansk Hava Limanının İdarə Heyətinin sədri Tomaş Kloskovski bildirib ki, marşrutun regional iqtisadiyyata mühüm təkan verəcəyini gözləyirik.
“Birbaşa əlaqə biznes əməkdaşlığını və ticarət əlaqələrini asanlaşdıracaq, eyni zamanda Yaxın Şərqdən Pomeraniya regionuna investorların cəlb edilməsinə kömək edəcək. Bu xətt hər iki istiqamətdə - Qdanskdan Ərəbistan yarımadasına və Körfəz regionundan Pomeraniyaya daha çox turistin gəlməsi ilə turizmi dəstəkləyəcək. Əvvəlki təcrübələr göstərir ki, Körfəz ölkələrindən gələn turistlər yerli turizm sənayesi üçün böyük dəyər formalaşdırır. Sərin yayı və Baltik dənizinə çıxışı ilə Trojmiasto və Pomeraniya bu səyahətçilər üçün getdikcə daha cəlbedici tətil məkanına çevrilir".-deyə o qeyd edib.
