BAKI, AzerVoice, Nailə Babazadə
Özbəkistanın Səmərqənd şəhəri sabah başlayacaq Birləşmiş Millətlər Təşkilatının Təhsil, Elm və Mədəniyyət Təşkilatının (UNESCO) 43-cü Baş Konfransına ev sahibliyi edəcək. Bu, şəhərin tarixində keçiriləcək ən böyük beynəlxalq tədbir olacaq.
AzerVoice xəbər verir ki, Böyük İpək Yolu üzərində yerləşən və 3 min illik zəngin tarixi ilə yüzdən çox mədəni və memarlıq abidəsinə sahib olan Səmərqənddə sabah UNESCO-nun ən yüksək qərarverici orqanı olan Baş Konfrans başlayır.
1985-ci ildən bəri ilk dəfə olaraq UNESCO-nun baş qərargahının yerləşdiyi Parisdən kənarda keçiriləcək bu tədbirdə dünyanın 194 ölkəsindən 5 mindən çox yüksək vəzifəli şəxs, alim və vətəndaş cəmiyyəti nümayəndəsi iştirak edəcək.
Orta Asiyada ilk dəfə təşkil edilən bu konfransın açılışında UNESCO-nun baş direktoru Odri Azule və Özbəkistan Prezidenti Şövkət Mirziyoyev çıxış edəcəklər. Mirziyoyevin çıxışında ölkəsinin mədəni diplomatiya və beynəlxalq əməkdaşlıq sahəsindəki baxışını təqdim edəcəyi gözlənilir.
Tarix boyu elm, təhsil, mədəniyyət və incəsənətin mərkəzlərindən biri olan Səmərqənd bu gün də mühüm beynəlxalq tədbirlərə ev sahibliyi etməyə davam edir. Şəhər 2022-ci ildə Şanxay Əməkdaşlıq Təşkilatı (ŞƏT) və Türk Dövlətləri Təşkilatının (TDT) Dövlət Başçıları Zirvələrinə, 2023-cü ildə isə BMT-nin Ümumdünya Turizm Təşkilatının 25-ci Baş Assambleyasına ev sahibliyi edib.
Səmərqənd 2022-ci ildə TDT tərəfindən “Türk Dünyasının Mədəniyyət Paytaxtı”, 2023-cü ildə “Dünya Turizm Paytaxtı”, 2024-cü ildə MDB tərəfindən “MDB Mədəniyyət Paytaxtı”, 2025-ci ildə isə İSESCO tərəfindən “İslam Dünyası Mədəniyyət Paytaxtı” elan edilib.
Sabahkı konfransda bir çox ölkələrin dövlət və hökumət başçıları, mədəniyyət nazirləri, beynəlxalq təşkilat rəhbərləri və qeyri-hökumət təşkilatlarının nümayəndələri iştirak edəcək. Tədbirdə Serbiya Prezidenti Aleksandar Vuçiç, Finlandiya Prezidenti Aleksander Stubb və Türkiyənin Təhsil Naziri Yusuf Tekin də iştirak edəcəklər.
UNESCO-nun 43-cü Baş Konfransı şəhər yaxınlığında 400 hektarlıq ərazidə yeni inşa edilmiş “İpək Yolu Səmərqənd” turizm kompleksinin Konqres Mərkəzində keçiriləcək. 18 min kvadratmetr qapalı sahəyə və 3 500 nəfərlik tutuma malik olan bu mərkəz MDB məkanında ən böyük konqres mərkəzi hesab olunur və 13 iclas zalından ibarətdir.
