BAKI,AzerVoice
Hind Rəcəb (3 may 2018 – 29 yanvar 2024) — Qəzza şəhərinin Təll əl-Həva məhəlləsindən olan altı yaşlı fələstinli qızcığaz idi. O, Qəzza zolağına edilən İsrail hücumu zamanı İsrail Ordusu tərəfindən öldürülüb. O, altı qohumu ilə birlikdə qaçdığı avtomobilə İsrail tankları tərəfindən atəş açıldıqdan sonra sağ qalan yeganə şəxs olmuşdu.
29 yanvar 2024–cü ildə Fələstin Qırmızı Aypara Cəmiyyəti 14 yaşlı Liyan Həmadə tərəfindən edilən telefon zəngi aldı – o, kömək istəyirdi. O, “Təll əl-Həva" bölgəsində "Maliyyə dairəsi" yaxınlığında İsrail tankının onların maşınına atəş açdığını bildirdi. Zəng zamanı Liyanın çığırtıları və intensiv güllə səsləri eşidildi, daha sonra əlaqə qəfil kəsildi.
Qırmızı Aypara zəngin audio yazısını yayımladı; Liyan orada deyirdi:
"Əmi, bizə atəş açırlar... Tanka çox yaxınıq... Biz maşındayıq və yanımızda tank var.”
Bundan dərhal sonra güllə səsləri eşidilir, Liyanın çığırtısı eşidilir və əlaqə tamamilə kəsilir.
Daha sonra Qırmızı Aypara Hindin hələ də sağ olduğunu müəyyən etdi. Qızın əmisi Sami Həmadə “Əl-ərəbiyə” telekanalına açıqlamasında Hindlə əlaqə saxladığını, onu sakitləşdirməyə çalışdığını və təcili yardım maşınının yolda olduğunu söylədi.
Bundan sonra təcili şəkildə Qırmızı Ayparaya məxsus xilasedici heyət Fələstin əlaqə mərkəzi ilə koordinasiya edilərək hadisə yerinə yollandı. Lakin bir neçə saat sonra onlarla əlaqə tamamilə itdi.
12 gün sonra — 10 fevral 2024 tarixində xilasedicilərin cəsədləri tapıldı. Həmçinin Hind Rəcəb (6 yaş), onun qohumları – Bəşar Həmadə, həyat yoldaşı və uşaqları Məhəmməd (11), Liyan (14), Rəğad (13) – hamısı Təll əl-Həva rayonunda mühasirəyə alınmış avtomobilin içində öldürüldükləri yerdə tapıldı.
Qırmızı Aypara həmçinin bölgədəki öz təcili yardım maşınını da tapdı və bildirdi ki, həmin maşın İsrail tərəfindən hədəfə alınaraq vurulub və xilasedicilər Yusif Zinuv və Əhməd Mədhun şəhid olublar.
İsrail ordusu hadisə bölgəsində hərbi kontingent olmadığını iddia etsə də, The Washington Post, Sky News və Forensic Architecture tərəfindən aparılan araşdırmalar ərazidə tankların yerləşdiyini, ailənin avtomobilinə və təcili yardım maşınına atəş açıldığını göstərib. Peyk görüntüləri Tel əl-Həva ərazisində ən azı 15 zirehli texnikanın olduğunu təsdiqləyib. Forensic Architecture-nin vizual və audio sübutlara əsaslanan rekonstruksiyası tank ekipajının maşında uşaqları görə biləcək məsafədə olduğunu müəyyən edib.
Hadisə yerində aşkar edilən M830A1 tipli ABŞ istehsalı mərmi hissələri hücumun tankdan açıldığını göstərib.
BMT-nin müstəqil ekspertləri Hindin öldürülməsinin müharibə cinayəti ola biləcəyini açıqlayıb. 2025-ci ildə Hind Rəcəb Fondu hadisəyə görə məsuliyyət daşıdığı iddia edilən 401-ci zirehli briqadanın komandiri polkovnik Beni Aharona qarşı Haaqa məhkəməsində şikayət qaldırıb.
Hadisə qlobal miqyasda rezonans doğurub. ABŞ universitetlərində tələbə aksiyaları zamanı ələ keçirilən binalar qızın adı ilə adlandırılıb: Columbia Universitetində “Hind’s Hall”, UC Berkeley-də “Hind’s House”. CNN də daxil olmaqla Qərb KİV-ləri hadisəni “Hind ölü tapıldı” kimi neytral başlıqlarla təqdim etdiyi üçün ictimaiyyət arasında tənqidə məruz qalıb.
Hind Rəcəb barədə bir neçə film çəkilib. Niderlandlı Amir Zazanın “Close Your Eyes, Hind” filmi 2025-ci ildə Niderland Film Festivalında “Qızıl Buzağı” mükafatını qazanıb. Tunisli Kauser Ben Heniya tərəfindən çəkilən “The Voice of Hind Rajab” filmi 82-ci Venesiya Film Festivalında Böyük Münsiflər Mükafatına layiq görülüb. Naci Salamehin “Hind Under Siege” filmi Qəzza Beynəlxalq Qadın Kinosu Festivalında Ən Yaxşı Qısa Film seçilib.
Hind Rəcəb müharibədə öldürülən uşaqdan daha çox, Qəzzada mühasirə, tibbi yardımın qarşısının alınması və mülki şəxslərə qarşı ağır silahların istifadəsi ilə bağlı qlobal simvollaşmış insanlıq faciəsi kimi yadda qalıb.
