QÜDS,ArabAZ
HƏMAS-ın yüksək rütbəli rəsmisi Bassem Naim bildirib ki, Yaxın Şərqdə Livana və onun hüdudlarından kənara yayılan sürətlə böyüyən münaqişənin, Qəzzada köklü böhran həll edilmədən sonu yoxdur.
Qəzza müharibəsi ikinci ilinə daxil olarkən İsrail qüvvələrinin hazırda İranın dəstəklədiyi Hizbullah yaraqlıları ilə toqquşduğu Livanın cənubunda döyüşlər alovlanıb və bu, toqquşmaların Tehranla hərtərəfli münaqişəyə çevriləcəyi ilə bağlı qorxuları artırır.
İki həftədən çox əvvəl İsrailə ikinci raket hücumuna cavab olaraq İsrailin İrana mümkün hücumu diqqət mərkəzində olduğu halda, döyüşləri dayandırmaq üçün diplomatik səylər zəifləyib.
“Məsələ çox mürəkkəbdir və hər iki cəbhə üçün bir-birinə bağlıdır. Qəzzada ilkin münaqişəni həll etmədən atəşkəs razılaşmasına nail olmaq və ya bu (Livan) münaqişəsinin daimi həllini tapmaq asan deyil”.-deyə Naim bildirib.
Naimin açıqlamaları, müharibəni dayandırmağın nə qədər çətin olduğunu təsdiqləyir.
Qəzza müharibəsi 2023-cü il oktyabrın 7-də HƏMAS döyüşçülərinin İsrailin cənubuna hücumundan sonra başlayıb və bu, İsrailin statistikasına görə, Qəzzada 1200 nəfərin ölümü və 250-dən çox insanın saxlanması ilə nəticələnib. Qəzzadakı səlahiyyətlilər deyirlər ki, cavab olaraq İsrailin hərbi kampaniyası 42 000-dən çox insanın ölümünə, zolağın böyük bir hissəsinin məhv edilməsinə və sakinlərinin əksəriyyətini qaçmağa məcbur edib. İsrail Qəzzada HƏMAS hərəkatını hərbi və hakim qüvvə kimi aradan qaldıracağına söz verib.
Hizbullah bu yaxınlarda Livanda mümkün atəşkəs haqqında danışmağa başladı, lakin Naim bunun Yaxın Şərqdəki digər cəbhələrə uzanan münaqişəni həll etməyəcəyini söyləyib.
“Livanda atəşkəsə nail olsalar belə, bölgə sakitləşməyəcək (çünki) Livan və ya Fələstinlə bağlı bütün məsələlərin həllini müzakirə etmirlər.”-deyə o bildirib.
Qətər və Misirin vasitəçiliyi ilə atəşkəs və israilli girovların geri qaytarılması ilə bağlı razılığa gəlmək cəhdləri heç bir nəticə vermədi, İsrail və HƏMAS isə danışıqların ləngiməsinə görə bir-birini ittiham edir.
Naim deyib ki, vasitəçilər münaqişənin Qəzza sərhədlərindən kənarda genişlənməsindən “məyusdurlar” və danışıqların uğursuzluğunu bir daha İsrailin üzərinə atıblar.
“Biz (İsrailin baş naziri) Benyamin Netanyahu tərəfindən qoyulan yeni şərtlərlə sadəcə danışıqlara başlaya bilmərik.”-deyə o bildirib.
Naim İsrailin Qəzzanın şimalına son hücumunu digər hücumlardan fərqli olaraq “boğucu və şiddətli mühasirə” adlandırıb.
İsrail deyir ki, onun qüvvələri son bir neçə gündə hərbi əməliyyatları zamanı onlarla HƏMAS döyüşçüsünü öldürüb, eyni zamanda, fələstinlilərin üzləşdiyi çətin humanitar şəraitlə bağlı beynəlxalq narahatlıq artır. ABŞ İsraili daha çox humanitar yardımın daxil olmasını təmin etməyə çağırıb.
Bununla belə, Naim qeyd edib ki, ABŞ-ın çağırışları onun İsrailə tam dəstəyi ilə uyğun gəlmir.
