BAKI, AzerVoice
ABŞ Konqresinin Nümayəndələr Palatası əməkdaşlarına Meta şirkətinə məxsus "WhatsApp" messencerindən istifadə etməmələri tövsiyə olunub.
AzerVoice xəbər verir ki, bu barədə "Financial Times" daxili yazışmalara istinadən məlumat yayıb.
Nümayəndələr Palatasının baş inzibati direktoru Ketrin Şpindor bazar ertəsi əməkdaşlara göndərdiyi məktubda "WhatsApp"ın istifadəçilər üçün yüksək risk daşıyan tətbiq hesab edildiyini bildirib.
30 iyun tarixindən etibarən Palataya məxsus noutbuk və mobil cihazlarda "WhatsApp"ın yüklənməsi və saxlanması qadağan olunacaq. Proqram artıq yüklənmiş olan cihazlardan silinməlidir.
Qərar messencerin istifadəçi məlumatlarının qorunması baxımından kifayət qədər şəffaf olmaması, saxlanılan məlumatların şifrələnməməsi və təhlükəsizlik sahəsində potensial risklər səbəbilə qəbul olunub.
Meta şirkəti bu yanaşma ilə qəti razılaşmadığını bildirib. Şirkətin nümayəndəsi deyib ki, "WhatsApp" mesajları avtomatik olaraq ucdan-uca şifrələnir və bu səbəbdən nə şirkət, nə də üçüncü tərəflər bu məlumatları oxuya bilməz. O həmçinin əlavə edib ki, "WhatsApp" Palatanın icazə verdiyi bir çox digər tətbiqlərdən daha təhlükəsizdir.
Həmin icazə verilmiş tətbiqlər arasında "Microsoft Teams", "Signal", "iMessage", "FaceTime" və "Wickr" yer alır. "Meta"nın məlumatına görə, "WhatsApp" ABŞ Senatında hələ də rəsmi istifadə üçün təsdiqlənmiş tətbiq olaraq qalır.
Ketrin Şpindor qeyd edib ki, Nümayəndələr Palatasının müdafiəsi onlar üçün əsas prioritetdir və kibertəhlükəsizlik sahəsində mümkün risklər daim nəzarətdə saxlanılır. Onun sözlərinə görə, Palatada icazə verilmiş tətbiqlərin siyahısı mütəmadi olaraq yenilənir və vəziyyətə uyğun olaraq dəyişdirilə bilər.
