BAKI, VOA
Böyük Britaniyanın Milli Səhiyyə Xidməti (NHS England) tibb işçilərini vaxt aparan sənədləşmə işlərindən azad etmək və birbaşa pasiyentlərin müalicəsinə daha çox vaxt ayırmaq məqsədilə süni intellekt texnologiyalarından istifadəni genişləndirir. Qurum yarım milyondan çox həkim, tibb bacısı və dəstək heyətini rəqəmsal assistentlə təmin etmək üçün "Microsoft 365 Copilot" sisteminin genişmiqyaslı tətbiqinə başladığını elan edib.
VOA xəbər verir ki, bu qərar 505 min inzibati işçinin gündəlik fəaliyyətini yüngülləşdirməyə, regional xəstəxanalarda (Trusts) xidmət keyfiyyətini artırmağa və büdcə xərclərini əhəmiyyətli dərəcədə azaltmağa yönəlib.
Böyük Britaniyanın Səhiyyə İnnovasiyaları və Təhlükəsizlik naziri Prit Kaur Gill (Preet Kaur Gill) mövzu ilə bağlı bildirib ki, texnologiya tibb heyətinin işini ləngitməməli, əksinə onlara dəstək olmalıdır. Hər gün həkimlər və tibb bacıları dəyərli vaxtlarını xəstələrdən uzaq düşərək daxili sənədləşmə işlərinə sərf edirlər. "Copilot" sisteminin tətbiqi bu yükü azaldacaq və heyətin öz əsas işinə – insanları sağaltmağa köklənməsinə şərait yaradacaq.
Süni intellekt assistenti tibbi sənədlərin, xəstələrin evə buraxılma vərəqələrinin (discharge) hazırlanmasında, növbə cədvəllərinin tərtibində, çarpayı fondunun idarə olunmasında, iclas protokollarının yazılmasında, həmçinin insan resursları, maliyyə və satınalma departamentlərinin işində aktiv şəkildə istifadə olunacaq. Müqavilə çərçivəsində xəstəxanalara "Copilot Studio" platformasına giriş imkanı da veriləcək ki, bu da hər bir regional tibb mərkəzinə öz daxili problemlərini həll etmək üçün xüsusi süni intellekt agentləri yaratmağa imkan yaradacaq. Yaradılan bütün sistemlərin təhlükəsizliyi "Agent 365" nəzarət mexanizmi ilə təmin ediləcək.
Bu böyük layihə 2025-ci ildə səhiyyə sahəsində dünyada keçirilmiş ən genişmiqyaslı süni intellekt sınağının uğurlu nəticələrinə əsaslanır. Həmin vaxt 90 fərqli tibb müəssisəsində çalışan 30,000-dən çox NHS əməkdaşı bu sistemi sınaqdan keçirib. Sınaqlar göstərib ki, süni intellekt hər bir işçinin gündəlik vaxtına orta hesabla 43 dəqiqə qənaət edir ki, bu da ildə hər şəxs üçün təxminən beş həftəlik iş vaxtı deməkdir. Tam tətbiqdən sonra sistemin ayda 400,000 saat iş vaxtına və yüz milyonlarla funt-sterlinq büdcə vəsaitinə qənaət edəcəyi proqnozlaşdırılır.
NHS England-ın Rəqəmsal və Texnoloji innovasiyalar üzrə direktoru Rob Tompson (Rob Thompson) və Microsoft-un Böyük Britaniya və İrlandiya üzrə baş icraçı direktoru Darren Hardmen (Darren Hardman) bu tərəfdaşlığın səhiyyə sistemində rəqəmsal transformasiyanı sürətləndirəcəyini və vergi ödəyicilərinin vəsaitlərinin daha səmərəli xərclənməsinə xidmət edəcəyini vurğulayıblar. Yeni proqram çərçivəsində ilk altı ay ərzində 200,000 istifadəçinin sistemə qoşulması, 12 ay ərzində isə tam inteqrasiyanın başa çatdırılması planlaşdırılır.
