Məkkənin daşınmaz əmlak bazarı zəvvarların və ümrə ziyarətçilərinin sayının artması, şəhərin qəbul potensialının genişlənməsi fonunda mehmanxana aktivlərinə investisiya istiqamətində sürətli transformasiya yaşayır. Bu tendensiya otelləri daşınmaz əmlak tərtibatçıları üçün əsas əməliyyat gəliri mənbəyinə çevirir. Otel gəlirlərindəki artım şirkətlərin maliyyə hesabatlarında özünü göstərir; bu da xüsusilə həcc və ümrə mövsümlərində doluluq nisbətlərinin və orta otaq qiymətlərinin yüksəlməsi ilə dəstəklənir.
Dayanıqlı tələbat qonaqpərvərlik bumunu gücləndirir
Maliyyə və iqtisadiyyat məsləhətçisi Dr. Hüseyn əl-Əttas bildirib ki, Məkkənin turizm sektoru tarixin ən güclü dövrlərindən birini yaşayır. Bu artım ümrə zəvvarlarının və turistlərin sayının davamlı artması, həcc kvotalarının mərhələli genişlənməsi və "Səudiyyə Vizyonu 2030" hədəfləri kimi struktur amillərə söykənir.
Məscidül-HərƏMİN genişləndirilməsi, nəqliyyat, yol və sürət qatarı şəbəkələrinin inkişafı, habelə ziyarətçi təcrübəsinin təkmilləşdirilməsi sektorun səmərəliliyini artırıb. Ümrə proqramlarının genişlənməsi sayəsində Məkkədə otellərə olan tələbat artıq yalnız pik mövsümlərlə məhdudlaşmır, bütün il boyu davamlı xarakter alır. Bu da developerlərin diqqətini torpaq və fərdi mənzil satışından uzunmüddətli gəlir gətirən aktivlərin saxlanılması və idarə olunmasına yönəldir.
Otellər gəlirliliyin əsas hərəkətverici qüvvəsinə çevrilir
"Jabal Omar Development" şirkətinin göstəriciləri bu transformasiyanın əyani nümunəsidir. Şirkət 2026-cı ilin ikinci rübündə xalis mənfəətə qayıdaraq səhmdarlara aid 158.1 milyon Səudiyyə riyalı xalis gəlir əldə edib (ötən ilin eyni rübündə 42.1 milyon riyal zərər qeydə alınmışdı). Şirkətin ümumi gəlirləri isə 42.5 faiz artaraq 715.2 milyon riyala çatıb. "Tadawul" birjasında yayımlanan açıqlamada gəlirlərin artması xüsusilə həcc mövsümündə otellərin yüksək performansı və ilin əvvəlində "Rotana" otelinin istifadəyə verilməsi ilə əlaqələndirilib.
Səudiyyədə qadınların İKT sektorundakı payı 35%-ə çatdı
Əl-Əttas qeyd edib ki, icarə və əməliyyat daxilolmalarının sabit təkrarlanan xarakteri şirkətlərə aktivlərin birdəfəlik satışından daha dayanıqlı pul axını (cash flow) təmin edir.
"Manassat Real Estate" şirkətinin baş icraçı direktoru Xalid əl-Mubəyyəd bildirib ki, Məkkə şəhəri qonaqpərvərlik sahəsində unikal və davamlı tələbat üstünlüyünə malikdir. Məscidül-Hərama yaxın ərazilərdə və logistika xətlərində otel və apart-otellərin beynəlxalq brendlərlə birlikdə idarə olunması investisiya cəlbediciliyini yüksəldir. Layihələrin dəyəri artıq təkcə tikinti xərcləri ilə deyil, onların əməliyyat keyfiyyəti və gəlirliliyi ilə ölçülür.
Bin Salmanın təşəbbüsü qlobal status aldı – qadınların rolu artırılır
Bazar təklifi və əməliyyat səmərəliliyi sınağı
Yeni otel layihələrinin çoxalması otaq sayının (təklifin) artmasına və operatorlar arasında rəqabətin güclənməsinə səbəb olur. Qısamüddətli perspektivdə bu amil müəyyən seqmentlərdə qiymət təzyiqi yaratsa da, dövlətin zəvvar sayını artırmaq hədəfləri orta və uzunmüddətli dövrdə bu təklifin asanlıqla mənimsəniləcəyini göstərir.
Lakin yüksək torpaq və tikinti xərcləri, enerji, texniki xidmət, əməkhaqqı və maliyyələşmə xərcləri, eləcə də yüksək faiz dərəcələri şirkətlərin mənfəət marjalarını sınağa çəkir. Ekspertlər vurğulayır ki, gələcək qazanc təkcə otaqların sayı ilə deyil, xidmət keyfiyyəti, düzgün gəlir idarəçiliyi (revenue management), əməliyyat xərclərinin optimallaşdırılması və ilboyu doluluğun qorunması ilə təmin ediləcək.
