İordaniya-Rumıniya əsilli ayaqqabı dizayneri Amina Muaddi Fransanın məşhur gözəllik evi "Lancome"un yeni reklam kampaniyasının siması olub. O, brendin "La vie est belle Very Cherry" ətrinin təqdimat çarxında öz brendinə məxsus hündürdaban ayaqqabılar və klatç çanta ilə çıxış edib. "Lancome" çarxı bu həftə "Instagram" səhifəsində "Onun imza addımı. Onun imza qoxusu" başlığı ilə yayımlayıb.
Videoçarxda Muaddi tünd qırmızı (oxblood) rəngli trikotaj və kostyum geyimində, tünd qırmızı dəri divan olan otaqda addımlayarkən təsvir olunur. O, divanda əyləşərək saplağından tutduğu albalı ilə görünür, ətri boynuna vurur və yaqut-qırmızı rəngli flakonu əlində fırladır.
Kamera onun brilliant ayaq bilərziyi (halxal) ilə tamamlanan tünd qırmızı laklı hündürdaban ayaqqabısına yönəlir, daha sonra isə əlinin qızılı çərçivəli uyğun "Amina Muaddi" klatç çantası üzərində dayandığı kadrla tamamlanır.
"Mənim üçün ətir əla ayaqqabının gördüyü işi görməlidir. O, sizə daha çox özünəinam bəxş etməli, baxımlı və daha çox özünüz kimi hiss etdirməlidir. Dostlarım həmişə zarafatla deyirlər ki, məni görməzdən əvvəl artıq gəldiyimi bilirlər. İlk olaraq bu parlaq albalı notunu duyursunuz, daha sonra isə isti ud qoxusu gəlir. Bu həm cəsarətli, həm zərifdir, ud isə ona bir qədər sirr qatır", - deyə Muaddi videoçarxda bildirir.
"Lancome" ətrin tərkibini bənövşə yarpağı ekstraktı üzərində qurulmuş qara albalı akkordu, əsas notlarda isə kakao yağı ekstraktı və Madaqaskar vanili ilə zənginləşdirilmiş zərif ud akkordu kimi təsvir edir. Ətir parfümerlər Antuan Mezonodyö və Kristof Rayno tərəfindən yaradılıb.
Muaddi çarxda "Ayaqqabı onların baxmasını təmin edir, lakin onları xatırladan məhz ətirdir. Bu, hər şeyin son nöqtəsidir (cherry on top)", - deyə əlavə edir.
Muaddi öz adını daşıyan ayaqqabı brendini lüks ayaqqabı markası "Oscar Tiye"nin həmtəsisçisi və kreativ direktoru vəzifəsindən ayrıldıqdan təxminən bir il sonra, 2018-ci ilin avqustunda təsis edib.
Parisdə yerləşən və İtaliyada istehsal olunan xətt Dua Lipa, Cici Hadid, Kayli Cenner və Heyli Biber tərəfindən geyinilən heykəltəraşlıq üslublu, genələn dabanları ilə tanınıb və sonradan əl çantaları istehsalı ilə genişlənib. Brend 2025-ci ildə Parisin Monten prospektində ilk müstəqil mağazasını və Dubayda "Level Shoes" mərkəzində ikinci satış nöqtəsini açıb.
Onun 2026-cı il yaz kolleksiyası 1990-cı illərin Nyu-York geyim tərzindən və Kerolin Bessettin sadə dəb üslubundan ilhamlanıb. Kolleksiyaya parlaq sürməyi timsah dərisi, tünd qəhvəyi və laklı qara rənglərlə yanaşı, pudra mavisi, açıq çəhrayı, nöqtəli atlas və krujevalı parçalardan hazırlanmış "Jamie Mule", "Mona Boot" və "Anok Sling 55" modelləri daxil edilib.
