BAKI,AzerVoice
Almaniyanın Bavariya klubunun futbolçusu Tomas Müller mövsüm sonunda müqaviləsinin başa çatması ilə komandadan ayrılacağını açıqlayıb.
AzerVoice xəbər verir ki, bu barədə Müller klubun rəsmi saytına açıqlama verib.
"Bavariya oyunçusu kimi keçirdiyim 25 illik yolculuq bu yay başa çatır. Bu, unikal təcrübələr, möhtəşəm qarşılaşmalar və unudulmaz qələbələrlə dolu inanılmaz bir səfər idi. Bu karyeranı sevimli klubumla birlikdə yaşadığım üçün böyük minnətdarlıq və sevinc hissi keçirirəm"- deyə Müller bildirib.
2000-ci ildə Bavariyanın akademiyasına qoşulan və 2008-ci ildə əsas komandada debüt edən 35 yaşlı Müller bütün karyerasını bu klubda keçirib.
Müller 12 Bundesliqa, 8 Almaniya Superkuboku, 6 Almaniya Kuboku, 2 UEFA Çempionlar Liqası, 2 UEFA Superkuboku və 2 FIFA Klublararası Dünya Kuboku daxil olmaqla ümumilikdə 32 titul qazanıb.
743 rəsmi oyunla klub tarixində ən çox matçda iştirak edən oyunçu olan Müller, bu qarşılaşmalarda 247 qol vurub, 273 məhsuldar ötürmə edib.
