BAKI, AzerVoice, Fərid Mikayılov
Mançester Yunayteddə Ruben Amorimin istefasından sonra yeni baş məşqçi axtarışları davam edərkən, klubun sabiq məşqçi heyətinin üzvü Rene Meulenstin rəhbərliyə Karlo Ançelottinin namizədliyini ciddi şəkildə nəzərdən keçirməyi tövsiyə edib.
AzerVoice xəbər verir ki, Meulenstin hazırda Braziliya millisinin baş məşqçisi olan, daha əvvəl “Çelsi”, “Bavariya”, “Real Madrid”, PSJ və “Milan” kimi klublarda çalışan Ançelottinin Yunaytedə itirilmiş qalibiyyət ruhunu qaytara biləcəyini bildirib.
Onun sözlərinə görə, 2013-cü ildə Ser Aleks Ferqyusonun gedişindən sonra Mançester Yunayteddə davamlı qalibiyyət sistemi formalaşmayıb. Baxmayaraq ki, Lui van Qal, Joze Mourinyo və Erik ten Haq dövründə müəyyən titullar qazanılıb, Premyer Liqa çempionluğu hələ də əlçatmaz olaraq qalır.
Meulenstin qeyd edib ki, Ançelotti böyük klublarda işləmək təcrübəsi, təzyiq altında qərar vermək bacarığı və müstəqil idarəetmə üslubu ilə Yunayted üçün ideal seçimdir:
Hazırda komandanı müvəqqəti olaraq Maykl Kerrik çalışdırır və klubun yay aylarında daimi baş məşqçi təyin edəcəyi gözlənilir. Mançester Yunayted Ançelottidən başqa Oliver Qlasner, Tomas Tuxel, Qaret Sautqeyt və Luis Enrike kimi mütəxəssislərlə də əlaqələndirilir.
Meulenstin eyni zamanda Ruben Amorimin yaxın vaxtlarda yenidən Premyer Liqada işləyəcəyinə şübhə ilə yanaşdığını bildirib. Onun fikrincə, portuqaliyalı mütəxəssis üçün Portuqaliya çempionatı daha uyğun seçim ola bilər.
Qeyd edək ki, Mançester Yunayted bu mövsüm tarixinin ən zəif dövrlərindən birini yaşayır və Avropa kuboklarından kənarda qalıb. Komandanın qarşıdakı əsas sınağı isə Mançester Siti ilə derbi oyunu olacaq.
