BAKI,AzerVoice, Fərid Mikayılov
Portuqaliya millisinin heyətində futbol üzrə 2016-cı il Avropa çempionatının qalibi olmuş tanınmış futbolçu Nani karyerasını Qazaxıstanda davam etdirəcək.
AzerVoice xəbər verir ki, təcrübəli yarımmüdafiəçi Qazaxıstanın “Aktobe” futbol klubu ilə müqavilə imzaladığını “X” sosial şəbəkəsindəki səhifəsində açıqlayıb.
Nani bildirib ki, “Aktobe”yə qoşulmaqdan məmnundur və həm klubun, həm də Qazaxıstan futbolunun inkişafına töhfə vermək niyyətindədir. Onun sözlərinə görə, klubun gələcəyə dair baxışı onda müsbət təəssürat yaradıb və həm ölkə daxilində, həm də beynəlxalq arenada yeni uğurlar qazanmaq üçün əzmlə çalışacaq.
Məlumata görə, futbolçu ilə imzalanan müqavilə 2026-cı ilin sonunadək qüvvədə olacaq.
Hazırda 39 yaşı olan Nani 2024-cü ilin dekabrında Portuqaliyanın “Eştrela Amadora” klubundan ayrıldıqdan sonra peşəkar futbol karyerasını başa vurduğunu açıqlamışdı. O, karyerası ərzində İngiltərənin dördqat çempionu olub, İngiltərə Superkubokunu və iki dəfə Liqa Kubokunu qazanıb.
Nani Mançester Yunaytedin heyətində UEFA Çempionlar Liqasının və Klublararası Dünya Çempionatının qalibi olub. Sportinq klubu ilə isə Portuqaliya Kubokunu üç dəfə, Liqa Kubokunu bir dəfə qazanıb.
