BAKI,VOA, Fərid Mikayılov

Xorvatiyalı mütəxəssis İqor Tudor İngiltərənin “Tottenhem” futbol klubunun baş məşqçisi vəzifəsindən ayrılıb.

VOA xəbər verir ki, klubun yaydığı məlumata görə, tərəflər qarşılıqlı razılıq əsasında əməkdaşlığa son qoyublar.

Tudorun komandadakı son oyunu martın 22-də keçirilib. Həmin görüşdə London təmsilçisi İngiltərə Premyer Liqasının 31-ci turunda “Nottingem Forest”ə 0:3 hesabı ilə məğlub olub.

Açıqlamada qeyd olunub ki, klub rəhbərliyi Tudorun qısa müddətdə gördüyü işlərə görə ona təşəkkür edir.

Xatırladaq ki, xorvatiyalı mütəxəssis “Tottenhem”ə 2026-cı il fevralın 14-də təyin olunmuşdu və cəmi 44 gün vəzifədə qalıb. Onun rəhbərliyi altında komanda 7 oyun keçirib, 1 qələbə qazanıb, 1 heç-heçə edib və 5 məğlubiyyət alıb.

Hazırda “Tottenhem” İngiltərə çempionatında 31 oyundan sonra 30 xalla 17-ci pillədə qərarlaşıb.