Bakı. AzerPress:

İran və Türkiyə iki sərhəd qapısının açılması üçün müzakirələr aparır.

AzerPress-in məlumatına görə, Türkiyə, İran sərhəd xətti boyunca ticarət mərkəzləri yaradaraq sərhəd ticarət hövzəsinin yaradılması təklifi üzərində işləyir.

Yanvar ayının sonunda Tehranda keçiriləcək Birgə İqtisadi Komissiyanın iclasında iki ölkə arasında ticarətin inkişafı üçün səylər göstəriləcək.

İki ölkənin sərhədində Gürbulak, Kapıköy və Esenderə sərhəd qapıları var. Gürbulakın 2021-ci ildə modernləşdirmə işlərinin başlaması ilə iki ölkə arasında nəqliyyat və sərnişin keçidləri iki qapıda cəmlənib. Bu il isə Gürbulakda işlərin yekunlaşması ilə keçidlərin normal vəziyyətə düşəcəyi gözlənilir.

Digər tərəfdən, İran və Türkiyə iki sərhəd qapısının açılması üçün çalışır. İran tərəfinin razılığı ilə bu qapılar Vandan açıla bilər.

Eyni zamanda, Covid-19 epidemiyası səbəbiylə dayandırılan Tehran-Van qatarının sərnişin xəttinin fəaliyyətini bərpa etməsi də Türkiyənin gözləntilərindən biridir.

Qeyd edək ki, yanvarın 4-də İran prezidenti İbrahim Rəisi Türkiyəyə rəsmi səfər edəcək.

Aytac Süleymanova

Twitter: a_alieva_