BAKI, AzerVoice, Nailə Babazadə
1963-cü il dekabrın 12-də Keniya Britaniyadan müstəqilliyini elan edib. Şərqi Afrika ölkəsi kolonial zülmdən azad olub, amma onun demokratiya uğrunda mübarizəsi hələ də bitməyib.
Bundan on il əvvəl, 1952-ci ildə Mau Mau Üsyanı kimi tanınan bir qiyam Britaniya koloniyasını sarsıdıb. Britaniyalılar üsyanı yatırmaq üçün təxminən 55 milyon funt sterlinq xərcləməklə yanaşı, mülki vətəndaşların qətliamlarını törədiblər, bir neçə yüz min keniyalını konsentrasiya düşərgələrinə salıblar və bəzi şəhərlərdə mülki azadlıqları dayandırıblar.
Müharibə üsyançıların çoxunun həbs edilməsi və edamı ilə başa çatıb, amma Britaniya da anlayıb ki, vəziyyət birdəfəlik dəyişib. Kolonial hökumət keniyalıların torpaq sahibi olmasını və əvvəllər yalnız avropalılara icazə verilən əsas gəlir gətirən məhsul — qəhvə yetişdirməsini asanlaşdıran islahatlar həyata keçirib. 1957-ci ildən etibarən keniyalılara Qanunvericilik Şurasına seçilməyə icazə verilib. Qitə üzrə milliyyətçi hərəkatlar güclənib və Britaniya imperiyasını maliyyə və hərbi baxımdan saxlaya bilmədiyi üçün 1960-cı ildə Britaniya hökuməti ilə Keniya müstəqillik hərəkatının nümayəndələri müstəqilliyi müzakirə etmək üçün görüşüblər.
Razılaşmaya görə, 66 nəfərlik Qanunvericilik Şurası yaradılmalı idi — 33 yer qara keniyalılara, 20 yer digər etnik qruplara ayrılıb. Mau Mau Üsyanından sonra Britaniya tərəfindən saxta ittihamlarla həbs edilmiş Kenya Afrika Milli Birliyinin keçmiş lideri Como Kenyatta 1 iyun 1963-cü ildə ölkənin Baş naziri kimi and içib və bu, müstəqillik keçidi üçün hazırlıq mərhələsi olub. Yeni ölkənin bayrağı Birliyin bayrağı əsasında hazırlanıb və mərkəzinə Masai qalxanı yerləşdirilib.
Amma Keniyanın problemləri müstəqilliklə bitməyib. Ölkənin şimalında etnik somali üsyançılarla döyüşlər müstəqillikdən 1969-cu ilə qədər davam edib. Kenyatta isə birpartiyalı idarəetmə qurub və 1978-ci ildə ölümünə qədər korrupsiyalaşmış, avtoritar şəkildə ölkəni idarə edib. Seçkilərin ədalətliliyi ilə bağlı suallar ölkəni hələ də narahat edir və buna görə də 2010-cu ildə yeni konstitusiya qəbul edilib. 1964-cü ildə respublika elan olunandan bəri Keniya cəmi beş prezidentə sahib olub.
