BAKI, AzerVoice

Danimarkada aparılan yeni bir araşdırma döyməsi olan şəxslərin dəri xərçəngi və limfoma inkişaf riskinin daha yüksək ola biləcəyini ortaya qoyub.

AzerVoice xəbər verir ki, Cənubi Danimarka Universitetində biostatistik Signe Bedsted Clemmensen və komandası əkizlər üzərində apardıqları iki fərqli tədqiqat metoduyla tatuirovka və xərçəng arasındakı mümkün əlaqəni araşdırıblar.

2367 əkiz üzərində aparılan kohort tədqiqatı göstərib ki, döyməsi olan şəxslərdə dəri xərçənginə tutulma riski dörd dəfə daha yüksəkdir.

Başqa bir araşdırmada 316 əkiz cütü müqayisə edilib və döymələri olan fərdlərin xərçəng riskinin 33-62% daha yüksək olduğu müəyyən edilib.

Tədqiqatçılar bildirirlər ki, döymə mürəkkəbində olan bəzi kimyəvi maddələr bədəndə toplana və immun sisteminə təsir edə bilər.

“Limfa düyünlərində döymə mürəkkəbi hissəciklərinin yığıldığı müşahidə edilib. Bu, immun sisteminin yad maddələrə davamlı reaksiya verməsinə səbəb ola bilər”, – deyə tədqiqatçılar qeyd edirlər.

Bununla belə, xüsusi mürəkkəb rəngləri ilə xərçəng riski arasında dəqiq bir əlaqə müəyyən edilməyib. Lakin qırmızı mürəkkəbin allergik reaksiyalara daha çox səbəb olduğu vurğulanıb.

Mütəxəssislər döymə etdirməyi düşünən şəxslərə mürəkkəb növünü diqqətlə seçməyi və mövcud sağlamlıq vəziyyətlərini nəzərə almağı tövsiyə edirlər.