BAKI, VOA, Orxan Qədirzadə
ABŞ Milli Kəşfiyyatının direktoru Tulsi Qabbard ölkənin kəşfiyyat ictimaiyyətinin son qiymətləndirməsini açıqlayaraq, İranın ötən ilki hücumlardan sonra nüvə zənginləşdirmə imkanlarını bərpa etmədiyini bildirib.
VOA xəbər verir ki, bu bəyanat Prezident Donald Trampın İrana qarşı müharibəyə başlamaq üçün gətirdiyi əsas arqumentlərdən birini ciddi şübhə altına qoyur.
Qabbard Senatın Kəşfiyyat Komitəsinə təqdim etdiyi yazılı ifadəsində bildirib ki, 2025-ci ilin iyununda həyata keçirilən "Midnight Hammer" əməliyyatı nəticəsində İranın nüvə proqramı "məhv edilib" və o vaxtdan bəri bərpa cəhdləri qeydə alınmayıb. Lakin kəşfiyyat rəhbəri bu məqamı şifahi çıxışı zamanı səsləndirməyib, bunu vaxt darlığı ilə əsaslandırıb. Demokrat senator Mark Uorner isə Qabbardı Trampın iddiaları ilə ziddiyyət təşkil edən hissələri qəsdən gizlətməkdə ittiham edib.
Ağ Ev İranın ballistik raket və hərbi dəniz donanmasının "funksional olaraq məhv edildiyini" iddia etsə də, kəşfiyyat hesabatları İranın hələ də regionda ciddi zərər vurmaq qabiliyyətini saxladığını və Hörmüz boğazı üzərində hərbi təsirini davam etdirdiyini göstərir. Qabbard həmçinin vurğulayıb ki, Ayətullah Əli Xamenei, Əli Laricani və İsmayıl Xatib kimi yüksək səviyyəli rəhbərlərin öldürülməsinə baxmayaraq, İran rejimi "parçalanmayıb, lakin əhəmiyyətli dərəcədə zəifləyib".
Müharibə əleyhinə mövqeyi ilə tanınan Milli Antiterror Mərkəzinin direktoru Co Kent isə Trampın müharibə qərarına etiraz olaraq istefa verib. O, İranın ABŞ üçün heç bir "qaçılmaz təhlükə" yaratmadığını bəyan edib.
