Birləşmiş Ərəb Əmirliklərinin (BƏƏ) axtarış-xilasetmə qrupu Nepalın daşqınlardan zərər çəkmiş Rasuva bölgəsində fəaliyyətə başlayıb.

ArabAZ xəbər verir ki,qrup Nepal hakimiyyəti ilə birbaşa koordinasiya şəraitində işləyir və zərərçəkmiş ərazilərdə axtarış-xilasetmə əməliyyatları aparır. Əməliyyatlar zamanı müasir avadanlıq və texnologiyalardan, o cümlədən havadan görüntüləmə və ərazinin tədqiqi, eləcə də üçölçülü xəritələrin hazırlanması üçün dronlardan istifadə olunur. Bu imkanlar zərərçəkmiş ərazilərə çıxışın təmin edilməsinə və axtarış məntəqələrinin müəyyənləşdirilməsinə kömək edir.

BƏƏ-nin Yardım Əməliyyatları direktoru Hamud Əl-Əfəri bildirib ki, qrupun fəaliyyətə başlaması ölkəsinin Nepalda zərərçəkənlərə dəstək göstərmək üçün imkan və təcrübəsindən istifadə etmək öhdəliyini əks etdirir. Onun sözlərinə görə, axtarış-xilasetmə imkanları ən çox ehtiyac olan ərazilərə yönəldilir və müasir texnologiyalar itkin şəxslərin axtarışını sürətləndirməyə imkan verir.

Qrupun fəaliyyəti daşqın və torpaq sürüşmələrindən zərər çəkmiş müxtəlif ərazilərdə davam edir. Əməliyyatlar əsas infrastrukturun və ilkin tələbat vasitələrinin məhv olduğu ərazilərə və kəndlərə çatmaqda yaranan çətinliklər fonunda həyata keçirilir.

BƏƏ bu əməliyyatlarla yanaşı, fəlakətdən zərər çəkənlərə humanitar və yardım dəstəyini də davam etdirir.