BAKI,VOA, Fərid Mikayılov
İran Xarici İşlər naziri Abbas Əraqçi İngiltərənin ABŞ-a hərbi baza təmin etməsini sərt tənqid edərək bildirib ki, bu addım “İrana qarşı hücuma iştirak” kimi qiymətləndiriləcək və ölkənin suverenliyini və müstəqilliyini müdafiə etmək hüququ qorunur.
VOA xəbər verir ki, Əraqçi İngiltərəli həmkarı Yvette Cooper ilə telefon danışığında ABŞ və İsrailin İran üzərinə hücumlarını və bölgədəki vəziyyəti müzakirə edib.
Görüşdə Əraqçi vurğulayıb ki, İran ikinci dəfə müzakirə masasında olduğu halda hərbi hücuma məruz qalır.
“ABŞ və İsrail rejimi beynəlxalq norma və prinsipləri pozaraq ölkəmizə hücum etdi. Xalqımızın lideri, bir sıra yüksək vəzifəli şəxslərimiz və içində 170-dən çox ibtidai sinif şagirdi olan çox sayda günahsız insan həyatını itirdi”- deyə o bildirib.
O, həmçinin ABŞ-İsrailin hücumlarına qarşı İranın müdafiə tədbirlərini İngiltərəli həmkarına çatdırıb və bəzi Avropa ölkələrinin bu açıq təcavüzə qarşı mənfi və qərəzli mövqeyini tənqid edib, bunun beynəlxalq hüququn pozulması olduğunu qeyd edib.
Əraqçi BMT Nizamnaməsinin 51-ci maddəsinə istinad edərək İranın qanuni müdafiə hüququnun olduğunu xatırladıb, qonşu ölkələrin suverenliyinə hörmət göstərdiklərini, lakin bəzi ölkələrdə yerləşən ABŞ bazalarından İranın hədəfə alındığını bildirib.
Nazir bildirib ki, bölgədəki qeyri-sabitlik yalnız hücumların dayandırılması ilə həll oluna bilər və müharibənin sona çatması “oxşar hücumların təkrarını önləyəcək zəmanətlərlə mümkündür”.
“Bu addımlar açıq şəkildə hücuma iştirak kimi qiymətləndiriləcək və iki ölkə arasındakı münasibətlər tarixində yer alacaq. Eyni zamanda ölkəmizin suverenliyini və müstəqilliyini qorumaq hüququmuz saxlanılır”- deyə Əraqçi İngiltərəyə xəbərdarlıq edib.
İranlı nazir İngiltərəli həmkarını ABŞ və İsrail ilə hərbi və media sahələrində hər hansı əməkdaşlıqdan çəkinməyə çağırıb.
