BAKI,VOA, Orxan Qədirzadə
Son iki gün ərzində Hörmüz boğazından müxtəlif təyinatlı 29 gəminin keçidi qeydə alınıb ki, bu da mart ayından bəri ən yüksək göstərici hesab olunur.
VOA xəbər verir ki, "Marine Traffic" platformasının məlumatlarına əsasən, 4-6 aprel tarixləri arasında boğazdan hər iki istiqamətdə neft tankerləri, qazdaşıyan və yük gəmiləri keçib. ABŞ və İsrail ilə İran arasında davam edən müharibə səbəbindən Tehranın tətbiq etdiyi məhdudiyyətlərə rəğmən, bu rəqəm son bir ayın rekordudur. Analizlər göstərir ki, keçid edən gəmilər arasında Çin şirkətlərinə məxsus 7 gəmi ilk sırada yer alır. Onları hər biri 5 gəmi olmaqla İran və Yunanıstan şirkətləri izləyir.
Məlumata görə, bütün gəmilər İranın ərazi sularında, Keşm adasının cənubu ilə uzanan dar bir marşrutdan istifadə ediblər. İran rəhbərliyi bəyan edib ki, Hörmüz boğazının tam açılması yalnız hücumlar nəticəsində dəyən zərərin ödənilməsi və yeni keçid sistemindən əldə olunacaq gəlirlər müqabilində mümkündür. Digər tərəfdən, ABŞ Prezidenti Donald Trampın sərt xəbərdarlıqlarına baxmayaraq, rəsmi Tehran müvəqqəti atəşkəs müqabilində boğazın açılması təklifini rədd edib.
Hazırda dünya neft və təbii qaz daşımalarının təxminən beşdə birinin keçdiyi bu strateji su yolu beynəlxalq gərginliyin mərkəzindədir. ABŞ və İsrail boğazın açılması üçün hərbi təhdidlərini artırsa da, İran tərəfi enerji infrastrukturuna hər hansı hücum olacağı təqdirdə bölgədəki digər enerji obyektlərini hədəf alacağı ilə bağlı xəbərdarlıq edib. İslam İnqilabı Keşikçiləri Korpusu (SEPAH) isə "icazəsi olmayan" bir neçə gəminin boğaza giriş-çıxışına qadağa qoyduğunu açıqlayıb.
